खुशी अगसीमनीचे राष्ट्रीय स्पर्धेसाठी निवड

बेळगाव : बेंगळूर येथे 39 व्या राज्यस्तरीय आर्टिस्टिक रोलर स्केटिंग स्पर्धेत बेळगावच्या आर्मी प्राथमिक शाळेची विद्यार्थिनी खुशी एकनाथ अगसीमनी हिने 3 रौप्यपदके पटकावून यश संपादन केल्याबद्दल एमएलआयआरसीच्या आर्मी शाळेतर्फे खास गौरव करण्यात आला. बेंगळूर येथे झालेल्या राज्यस्तरीय रोलर स्केटिंगमध्ये (सोलो फ्रीस्टाईल) खुशी अगसीमनीने 3 रौप्यपदके पटकाविली आहेत. तिच्या या कामगिरीमुळे एसजीएफआय राष्ट्रीय स्केटिंग स्पर्धेसाठी तिची निवड झाली आहे. खुशीने या स्पर्धेत मिळविलेल्या कामगिरीची दखल घेऊन आर्मी प्राथमिक शाळेच्या मुख्याध्यापिका दर्शना ओसवाल व शिक्षक वर्गाने तिचा खास गौरव केला. तिला क्रीडा शिक्षक लक्ष्मी बडमंजी, रेखा जांगळे यांचे बहुमूल्य मार्गदर्शन तर दर्शना ओसवाल यांचे मार्गदर्शन लाभत आहे.