के. आर. शेट्टी संघाचा 4 गड्यांनी विजय

बेळगाव : युनियन जिमखाना मैदानावरती सिघन चषक टी-20 क्रिकेट स्पर्धेत के. आर. शेट्टी संघाने टिळकवाडी क्लबचा 4 गड्यांनी पराभव करुन 2 गुण मिळविले. युनियन जिमखाना मैदानावर स्पर्धेच्या उद्घाटन प्रसंगी प्रमुख पाहुणे म्हणून निवृत्त जवान विरेश गौडर, शंकर कुगडोळी, राघवेंद्र, एन. बी. पाटील, विजय कुरी व अनिल गवी आदी मान्यवर उपस्थित होते. टिळकवाडी  क्रिकेट क्लबने प्रथम फलंदाजी करताना 20 षटकात 8 गडी बाद 144 धावा केल्या. त्यात दीपक बिल्लने 3 षटकार 2 चौकारासह 48, रोहीत दोडवाडने 3 चौकारांसह 19, वेदांत कोकितकरने 2 षटकारासह 18, ओमकार पाटीलने 3 चौकारासह 17, शिवम यादवने 3 चौकारासह 13 तर मालु जी.एम.ने 11 धावा केल्या. के. आर. शेट्टीतर्फे मिलिंद बेळगावकरने 12 धावांत 2, संतोष सुळगे-पाटीलने 38-2, सुनिल सक्री, राहुल शिंदे, शिवाजी पाटील यांनी प्रत्येकी 1 गडी बाद केला. प्रत्युत्तरादाखल खेळताना के. आर. शेट्टी संघाने 19.2 षटकात 6 गडी बाद 145 धावा करुन सामना 4 गड्यांनी जिंकला. राहुल शिंदेने 1 षटकार 4 चौकारासह 49, गुरुप्रसाद पोतदार 4 चौकारासह 24, प्रशांत लायंदरने 2 चौकारासह 18, प्रणय शेट्टीने 13 तर संतोष सुळगे-पाटीलने 12 धावा केल्या. टिळकवाडीतर्फे ओमकार पाटीलने 23 धावांत 3 तर रोहीत दोडवाड, कुनाल हिरोजी यांनी प्रत्येकी 1 गडी बाद केला.