वृत्तसंस्था / शिमला
हिमाचल प्रदेशात होळीच्या दिवशी बस घाटात कोसळल्याने झालेल्या अपघातात पाच जणांचा मृत्यू झाला, तर 35 जण जखमी आहेत. हिमाचल प्रदेशातील चंबा जिल्हय़ात मंगळवारी सकाळी 6.45 च्या सुमारास हा अपघात झाला आहे. योगेश कुमार (47), पूजा कुमारी (28), राजीव कुमार (37), मणी राम (33) आणि दावत अली (30) अशी अपघातातील मृतांची नावे आहेत, अशी माहिती पोलिसांनी दिली. उत्तराखंडहून देहरादूनमार्गे येणारी हिमाचल राज्य मार्ग परिवहन मंडळाची (एचआरटीसी) बस चंबा पठाणकोट मार्गावरील चहलीनजीक घाटात कोसळली. या दुर्घटनेत चार प्रवाशांचा जागीच मृत्यू झाला, तर एकाचा उपचारादरम्यान मृत्यू झाला. जवळपास 34 जण जखमी झाले असून, त्यांच्यावर चंबा वैद्यकीय महाविद्यालयात उपचार सुरू आहेत. दुर्घटनेनंतर प्रवाशांचा आरडाओरडा ऐकल्यावर घटनास्थळी पोहोचलेल्या स्थानिकांनी जखमींना बसमधून बाहेर काढले आणि खासगी वाहनातून चंबा वैद्यकीय महाविद्यालयात उपचारासाठी दाखल केले. अपघाताचे कारण अद्याप समजू शकले नसून, पोलीस या प्रकरणाचा तपास करत आहेत.
