क्रीडा प्रतिनिधी / बेळगाव
दीपक नार्वेकर पुरस्कृत 16 वर्षाखालील बीपीसी लीग क्रिकेट स्पर्धेत गुरूवारी खेळविण्यात आलेल्या सामन्यात सुपर एक्स्प्रेस अर्जुन स्पोर्ट्स संघाने साईराज हुबळी टायगर्स संघाचा 21 धावानी तर एक्सेस इलाईट हुबळीने एमसीसीसी नविलू संघाचा 119 धावानी पराभव केला. अष्टपैलू आकाश असलकर (सुपर एक्स्प्रेस) व सिद्धांत कदम (एक्सेस) यांना सामनावीर पुरस्कार देऊन गौरविण्यात आले.
युनियन जिमखाना मैदानावर गुरूवारी खेळविण्यात आलेल्या पहिल्या सामन्यात सुपर एक्स्प्रेस अर्जुन स्पोर्ट्स संघाने 25 षटकात सर्व बाद 146 धावा केल्या. 3 बाद 31 अशी नाजुक स्थिती असताना ध्रुव देसाई व कुशल कित्तुर यांनी चौथ्या गडय़ासाठी 44 धावांची भागीदारी केली. आकाश असलकरने 4 चौकारासह 43, ध्रुव देसाईने 40, कुशल कित्तूरने 23 तर केशव मुक्कण्णावरने 15 धावा केल्या. साईराज हुबळीतर्फे सुजल पाटीलने 25 धावात 4, दर्शन मयेकरने 30 धावात 2 तर आकाश कुलकर्णी, आर. एन. गवळी यांनी प्रत्येकी 1 गाडी बाद केला. त्यानंतर साईराज हुबळी टायगर्सला 25 षटकात 8 बाद 125 धावाच करता आल्या. कार्तिक शिरूरने 1 षटकार, 4 चौकारासह नाबाद 55, रोहन यारिसीमीने 26 तर दर्शन मयेकरने 14 धावा केल्या. सुपर एक्स्प्रेसतर्फे आकाश असलकरने 20 धावात 2, ध्रुव देसाईने 26 धावात 2, करण बोकडे, हर्ष पाटील, सिद्धेश असलकर यांनी प्रत्येकी 1 गडी बाद केला.
दुसऱया सामन्यात एक्सेस इलाईटने 25 षटकात 9 बाद 229 धावांचा डोंगर उभा केला. त्यात प्रभू सषलट्टीने 1 षटकार, 6 चौकारासह 36 चेंडूत 48, कर्णधार ऋषिकेश राजपूतने 40, पवन नागेशने 34 तर सिद्धांत कदमने 19 धावा केल्या. एमसीसीसीतर्फे रेहान सनदीने 33 धावात 3, मनिकांत बुकीटगारने 28 धावात 2 तर सुजल कळसण्णावरने 53 धावात 2 गडी बाद केले.
प्रत्युत्तरादाखल खेळताना एमसीसीसी नविलूने 25 षटकात 9 बाद 110 धावाच केल्या. राहुल नाईकने 34, मनिकांत बुकिटगारने 20 तर रेहान सनदीने 18 धावा केल्या. एक्सेस इलाईटतर्फे प्रियराजन यादवने 12 धावांत 2, तेजस मुर्डेश्वरने 22 धावात 2 तर सिद्धांत कदमने 27 धावात 2 गडी बाद केले. सामन्यानंतर प्रमुख पाहुणे निरंजन बस्तवाडकर, श्रीप्रसाद ठाकुर, सुनील अष्टेकर, विक्रम देसाई यांच्या हस्ते आकाश असलकर याला तर श्रीपाद पाटील, संतोष रायकर, आशा रायकर, जया राजपूत यांच्या हस्ते सिद्धांत कदमला सामनावीर पुरस्कार देऊन गौरविण्यात आले.
शुक्रवारचे सामने -1) सुपर एक्स्प्रेस अर्जुन स्पोर्ट्स वि. अलोन स्पोर्ट्स, सकाळी 9.30 वा. 2) एक्सेस इलाईट वि. सहारा स्पोर्ट्स, दुपारी 1.30 वा.
