प्रतिनिधी/सातारा :
कोरोना प्रार्दुभाव रोखण्यासाठी जिल्हाधिकारी शेखर सिंह यांचे आदेशान्वये जिह्यात क्रिमीनल कोडचे कलम 144 लागू करण्यात आले आहे. सातारा तालुक्यातील नजीकच्या ग्रामपंचायतींचे क्षेत्र व नगरपालिका व त्रिशंकू क्षेत्र प्रतिबंधात्मक क्षेत्र करण्यासाठी उपविभागीय दंडाधिकारी तथा इन्सिडंट कमांडर सातारा यांच्या प्रस्तावानंतर रात्री उशिरा जिल्हाधिकारी मनाई आदेश कडक केल्याने आता साताऱयासह उपनगरांना 100 टक्के लॉकडाऊन पाळावा लागणार आहे.
सातारा तालुक्यात जास्त प्रमाणात कोरोना विषाणूंचा संसर्ग झालेले रुग्ण आढळत असल्याने सातारा तालुक्यातील खेड, विलासपूर, गोडोली, शाहुपूरी, म्हसवे, सैदापूर, वाढे, कोडोली, संभाजीनगर या ग्रामपंचायतींचे क्षेत्र तसेच सातारा नगरपालिका क्षेत्र व त्रिशंकू क्षेत्र या संपूर्ण या कंटेनमेंट झोनमध्ये कोरोना विषाणूंचा वाढता प्रादुर्भाव नियंत्रणात ठेवण्यासाठी क्रिमिनल प्रोसिजर कोड 1973 चे कलम 144 मधील तरतूदीनुसार पुढीलप्रमाणे 30 एप्रिल रोजीच्या रात्री बारा वाजल्यापासून ते पुढील आदेशापर्यंत मनाई आदेश जारी केले आहेत. त्यामुळे या संपूर्ण क्षेत्रामध्ये कोणत्याही सार्वजनिक ठिकाणी एका वेळेस 2 पेक्षा जास्त व्यक्तींना जमा होणेस सक्त मनाई करण्यात आली आहे.
या आदेशामधून अत्यावश्यक सेवेमध्ये कार्यरत असणारे शासकीय, निम शासकीय, खासगी अधिकारी, कर्मचारी वगळण्यात येत आहेत. अत्यावश्यक सेवेतील शासकीय कार्यालय चालू राहतील. शासनमान्य शिवभोजन थाळीची सुविधा चालू राहील. व्यक्तींची आरोग्य विषयक माहिती संकलित करणेकामी नियुक्त करण्यात आलेल्या कर्मचाऱयांना चुकीची माहिती देणे हा गंभीर स्वरुपाचा गुन्हा असून अशी चुकीची माहिती देणाऱया विरुध्द कठोर कारवाई करण्याची तरतूद आहे. त्यामुळे विचारलेली माहिती न लपविता पूर्णपणे तसेच अचूकरित्या नागरिकांनी द्यावी. व नियुक्त केलेल्या सर्व अधिकारी-कर्मचाऱयांशी सौजन्याने वागावे.
फक्त या गोष्टी सुरु राहतील
या प्रतिबंधित क्षेत्रात दवाखाने, हॉस्पीटल, नर्सिंग होम वगळून इतर सर्व प्रकारची दुकाने उघडण्यास सक्त मनाई करण्यात आली आहे. अत्यावश्यक सेवेतील घरगुती गॅस सिलेंडर घरपोच वितरण करण्याकामी या आदेशातून सूट देण्यात आली आहे. औषधे व दूध घरपोच पुरविण्याबाबत उपविभागीय अधिकारी तथा इन्सीडंट कमांडर सातारा ज्याप्रमाणे यंत्रणा उभारतील त्याप्रमाणे औषधे व दूधपुरवठा घरपोच पुरविण्यात येईल.
