प्रतिनिधी / मिरज
मिरजेत धावत्या रेल्वेतून पडल्याने अज्ञात तरुण जागीच ठार झाला. कृष्णाघाट रस्त्यावर बेळगाव रेल्वे गेटजवळ ही घटना घडली. याबाबत रेल्वे पोलीसात नोंद आहे. मिरज-कृष्णाघाट रस्त्यावर बेळगाव रेल्वे गेट पासून पाचशे मीटर अंतरावर रेल्वे रूळाजवळ एका अनोळखी तरुणाचा मृतदेह सापडला. रेल्वे मार्ग तपासणीसाठी रेल्वे कर्मचारी जात असताना बेळगाव पंढरपूर रेल्वे मार्गावर अज्ञात तरुणाचा मृतदेह सापडला. रेल्वे पोलिसांना माहिती देण्यात आली. डोक्याला जबर मार लागल्याने डोक्याचा चेंदामेंदा होऊन तरुणाच्या मृत्यू झाल्याने रेल्वेतून पडून मृत्यू झाल्याचा पोलिसांचा अंदाज आहे.
सहाय्यक फौजदार बाळासाहेब पाटील, हवालदार इब्राहिम अरभावी यांनी मृतदेह पंचनामा करून शवविच्छेदनासाठी पाठविला. मृत तरुणासोबत एका महिलेचा फोटो सापडला असून, त्यावर आरिफ असे नाव आहे. हा फोटो हुबळीत काढण्यात आला आहे. रेल्वे पोलीस मृत तरुणाची ओळख पटविण्याचा व नातेवाईकांचा शोध घेत आहेत.
