पुलाची शिरोली / वार्ताहर
शिये ता. करवीर येथे इर्टीका कार व प्लेझर मोपेडची समोरासमोर धडक बसून कोल्हापूर येथील महाविद्यालयीन विद्यार्थीनी जागीच ठार तर दुसरी शिये येथील गंभीर जखमी झाली. शिये – वडणगे रोडवरील खडी क्रशर परिसरातील हॉटेल अशोक येथे हा अपघात शनिवारी दुपारी अडीच वाजता झाला. कु. आर्या संजय पाटील रा. कोल्हापूर वय वर्षे १८ असे मयत विद्यार्थ्यीनीचे नाव आहे. तर मल्लिका मन्सूर पठाण जखमी विद्यार्थीनीचे नाव आहे.
शिरोली पोलिसांकडून मिळालेली माहिती अशी की, आर्या पाटील रुईकर कॉलनी कोल्हापूर व शिये येथील मल्लिका पठाण या दोघीं मैञीनी विवेकानंद कॉलेज येथे बारावीच्या वर्गात शिक्षण घेत आहेत. आर्या हि मल्लिका पठाण हिला एम एच 09 बी आर 2285 या प्लेझर मोपेड वरुन शिये येथे घरी पोहचविण्यासाठी आली होती.
दरम्यान खडी क्रशर परिसरात हॉटेल अशोक येथे शिये गावातून महामार्गाकडे भरधाव वेगाने व निष्काळजीपणाने गाडी चालवत असलेल्या एम एच 09 एफ जे 7070 या इर्टीका कारची समोरासमोर धडक बसली. यामध्ये आर्याच्या डोक्याला मार बसल्यामुळे ती जागीच ठार झाली. तर मल्लिका पठाण ही जखमी होवून हात फ्रॅक्चर झाला आहे. तिच्यावर खाजगी दवाखान्यात उपचार सुरू आहेत. इर्टीका कार ही शिये येथील एका राजकीय व्यक्तीच्या घरी आली होती. अपघात घडताच ती व्यक्ती कार न थांबवताच घटना स्थळावरुन निघून गेली. त्यामुळे कार चालकाचे नाव अद्याप समजलेले नाही. या अपघाताची नोंद शिरोली एमआयडीसी पोलीस ठाण्यात झाली आहे.
