प्रतिनिधी/ मडगांव
राज्यात कोरोनाची प्रकरणे वाढत आहेत आणि गोव्यासाठी नोव्हेंबर आणि डिसेंबर ही खूप अवघड वेळ आहे. आम्ही अजूनही साथीच्या रोगात असून इतर देशांची परिस्थिती पाहिल्यास शाळा पुन्हा सुरू करणे प्राणघातक ठरू शकते, असे नावेलीचे आमदार लुईझिन फालेरो यांनी म्हटले आहे.
जेव्हा या वर्षाच्या सुरुवातीला कोरोना व्हायरस आपल्या दारावर ठोठावत होता, तेव्हा सावधगिरीचा उपाय म्हणून लॉकडाऊन पुकारण्यात आला. आम्ही अजूनही साथीच्या आजारात आहोत आणि शाळा पुन्हा सुरू करणे जीवघेणा ठरू शकते. सावधगिरीने शाळा पुन्हा सुरू करण्याबाबत सरकारचे विचार ‘स्पष्टपणे चुकीचे’ आहेत असे सांगून फालेरो म्हणाले की, ‘सरकारी रुग्णालये रूग्णांनी ओसंडून वाहतात, रुग्णांना घरीच उपचार करावे लागतात. शैक्षणिक संस्था उघडण्यासाठी सरकार प्रमाणित कार्यपद्धती घेऊन येत आहे हे अत्यंत चुकीचे आहे.’
पालक आपल्या मुलांना शाळेत पाठविण्यास कचरतात. म्हणूनच, राज्यातील शाळा पुन्हा सुरू करण्याबाबत निर्णय घेण्यापूर्वी सरकारने पालक-शिक्षक संघ, शाळा व्यवस्थापन, विद्यार्थी संस्था इत्यादी सर्व घटकांना व़िश्वासात घेतले पाहिजे.
