सेन्सेक्स 364 अंकांनी तेजीत : निफ्टी 11,466.45 वर बंद
वृत्तसंस्था / मुंबई
जागतिक शेअर बाजारातील सकारात्मक वातावरणामुळे विदेशी संस्थांमधील गुंतवणूकदारांनी भांडवल गुंतवणुकीचा वेग कायम ठेवल्याचे पहावयास मिळाले आहे. याचाच परिणाम म्हणून देशातील वित्तीय कंपन्यांचे समभाग आठवडय़ातील पहिल्या दिवशी सोमवारी मजबूत होत बाजारात तेजी राहिल्याची नोंद करण्यात आली आहे.
बीएसई सेन्सेक्स सोमवारी 364 अंकांनी उसळला तर दिवसभरातील कामगिरीनंतर सेन्सेक्स 364.36 अंकांनी वधारुन निर्देशांक 38,799.08 वर बंद झाला. दुसऱया बाजूला राष्ट्रीय शेअर बाजाराचा निफ्टी दिवसअखेर 94.85 अंकांनी तेजी प्राप्त करत 11,466.45 वर स्थिरावल्याचे पहावयास मिळाले आहे.
प्रमुख कंपन्यांमध्ये कोटक बँकेचे समभाग सर्वाधिक 3 टक्क्मयांनी तेजीत राहिलेत. सोबत इंडसइंड बँक, बजाज फायनान्स, एचडीएफसी बँक, आयसीआयसीआय बँक, बजाज फिनसर्व्ह, मारुती सुझुकी आणि स्टेट बँकेचे समभाग वधारले होते. अन्य कंपन्यांमध्ये पॉवरग्रिड कॉर्प, महिंद्रा ऍण्ड महिंद्रा, टेक महिंद्रा, टायटन, एनटीपीसी, बजाज ऑटो आणि अल्ट्राटेक सिमेंटचे समभाग घसरणीसह बंद झाले आहेत.
अन्य घडामोडींचा प्रभाव
जागतिक शेअर बाजाराचा कल सकारात्मक राहिल्याचा लाभ हा वित्तीय कंपन्यांना घेता आल्याने समभागांमध्ये लिलाव मोठय़ा प्रमाणात राहिल्याचे पहावयास मिळाले. यासोबतच विदेशी संस्थांकडून गुंतवणुकीचा प्रवाह सलग राहिल्यानेही गुंतवणूकदारांना विश्वास प्राप्त झाला असल्याचे तज्ञांनी म्हटले आहे.
शेअर बाजारात विदेशी संस्थांमधील गुंतवणूकदारांकडून शुक्रवारी निव्वळ स्वरुपात 410.16 कोटी मूल्याचे समभाग खरेदी करण्यात आले आहेत. तर सोमवारी आशियातील अन्य बाजारांमध्ये चीनमधील शांघाय, हाँगकाँग, जपानमधील टोकीओ आणि दक्षिण कोरियाचा सोल या शेअर बाजारात समाधानकारक तेजी राहिली होती.
