ओटवणे /प्रतिनिधी-
एसएससी परीक्षेत ९९.६० टक्के गुण पटकावित गवळी समाजातून जिल्ह्यात प्रथम आलेल्या कु. रुपेश संतोष गवळी या विद्यार्थ्यांचा महाराष्ट्रीय यादव चॅरिटी ट्रस्टच्या वतीने गौरव करण्यात आला.
कु रुपेश संतोष गवळी याने फोंडाघाट न्यू इंग्लिश स्कुल या प्रशालेतून प्रथम क्रमांक तर कणकवली तालुक्यात तिसरा क्रमांक पटकावला आहे. रूपेश गवळी याने समाजाचे नाव उज्ज्वल केल्याबद्दल त्याचा महाराष्ट्रीय यादव चॅरिटी ट्रस्ट सिंधुदुर्ग जिल्हा शाखेच्यावतीने फोंडाघाट येथे जाऊन त्याचा शाल, श्रीफळ, सन्मानचिन्ह, प्रमाणपत्र, पुष्पगुच्छ व भगवद् गीता देऊन गौरव करण्यात आला.
ट्रस्टचे जिल्हा शाखा कार्यकारिणी सदस्य तथा निवृत्त जिल्हा पणन अधिकारी नामदेव गवळी यांच्याहस्ते रूपेश गवळीचा सत्कार करण्यात आला. यावेळी कु. रुपेश गवळी याने भविष्यात आपणास स्पर्धा परीक्षांमध्ये यश मिळवून प्रशासकीय अधिकारी होण्याचे आपले स्वप्न असल्याचे मनोगत व्यक्त केले.
यावेळी महाराष्ट्रीय यादव चॅरिटी ट्रस्टचे सिंधुदुर्ग जिल्हा कार्याध्यक्ष दशरथ शृंगारे, सचिव रामदास बुराण, सहसचिव कृष्णा पंदारे, जेष्ठ सदस्य बयाजी बुराण, सदस्य रामचंद्र भालेकर, प्रशांत बुराण आदी उपस्थित होते.
