घाबरण्याची नव्हे, काळजीचीगरज : योग्य उपचाराअंती रुग्ण होतात बरे डीन डॉ.शिवानंद बांदेकर यांची माहिती
प्रतिनिधी / पणजी
गोव्यात आतापर्यंत काळय़ा बुरशीचे (ब्लॅक फंगस) एकूण 10 सक्रिय रुग्ण सापडल्याची माहिती गोमेकॉचे डीन डॉ. शिवानंद बांदेकर यांनी दिली असून त्यातील 6 जणांवर उपचार चालू आहेत आणि 3 जण उपचाराच्या प्रतीक्षेत असल्याचे त्यांनी स्पष्ट केले. त्या बुरशीमुळे एक रुग्ण दगावल्याचेही त्यांनी पुढे सांगितले.
पणजीत काल सोमवारी घेण्यात आलेल्या पत्रकार परिषदेत डॉ. बांदेकर यांनी वरील माहिती दिली.
यापूर्वी काळय़ा बुरशीचे 6 रुग्ण सापडल्याची माहिती देण्यात आली होती. आता त्यात वाढ झाल्याचे समोर आले असून ती सरकारसाठी एक डोकेदुखी बनल्याचे दिसून येत आहे. परिषदेला आरोग्य खात्याचे सचिव रवी धवन, गोमेकॉतील बालरोग विभाग प्रमुख मिमी सिल्वेरा, डॉ. जगदीश काकोडकर, डॉ. राजेंद्र बोरकर यांची उपस्थिती होती.
उपचाराअंती रुग्ण होतात बरे
गोमेकॉत काळय़ा बुरशीच्या रुग्णांवर योग्य ते उपचार करण्यात येतात आणि तशी व्यवस्था तेथे करण्यात आल्याचे डॉ. बांदेकर यांनी नमूद केले. गोमेकॉत त्यासाठी वेगळा विभाग करण्यात आल्याचे ते म्हणाले. उपचाराअंती ते रुग्ण बरे होतात, असे त्यांनी सांगितले.
मार्चपासून आतापर्यंत म्हणजे गेल्या तीन महिन्यात 0 ते 17 वयोगटातील सुमारे 16426 जणांना कोरोनाची बाधा झाल्याचे समोर आले आहे. त्यातील 150 जणांना हॉस्पिटलात दाखल करावे लागल्याची माहिती डॉ. सिल्वेरा यांनी दिली.
तिसऱया लाटेसाठी विशेष वॉर्ड तयार
तिसऱया कोरोना लाटेत 2 टक्के गंभीर रुग्ण मिळू शकतात. त्यांच्यावर उपचार करण्यासाठी 30 बेडचा आयसीयू विशेष वॉर्ड तयार करण्यात आला असून गोमेकॉतील त्या वॉर्डात गंभीर रुग्णांवर उपचार होतील, तर कमी लक्षणे असलेल्या रुग्णांवर दोन्ही जिल्हा सरकारी इस्पितळात उपचार करण्याची योजना आखण्यात आल्याचे त्यांनी नमूद केले.
दहा दिवस राबविणार ‘टिका उत्सव’
राज्यात 45 वर्षावरील अनेकजण अजूनही लसीकरणासाठी पुढे येत नाहीत. त्याचे डोस शिल्लक असून ते देण्यासाठी तसेच ‘टिका’ उत्सवाचा पाठपुरावा म्हणून 45 वर्षावरील लोकांसाठी पुन्हा एकदा खास मोहीम राबविण्यात येणार आहे, अशी माहिती लसीकरणाचे प्रमुख डॉ. राजेंद्र बोरकर यांनी दिली. राज्यातील 164 पंचायतीत ती मोहीम सुमारे 10 दिवस चालणार असून 45 वर्षावरील सर्वांनी न घाबरता लसी घेण्यासाठी पुढे यावे आणि ती टोचून घ्यावी, असे आवाहन डॉ. बोरकर यांनी केले.
पंचेचाळीस वर्षांवरील लोकांचे डोस अजूनही शिल्लक
कोरोनाला रोखण्यासाठी तसेच प्रतिकारशक्ती वाढावी म्हणून लसीकरण महत्वाचे आहे. म्हणून गोव्यातील जास्तीत जास्त लोकांचे लसीकरण झाले पाहिजे. गैरसमजामुळे अनेकजण अजूनही त्यासाठी पुढे येत नाहीत. गोव्यात अजुनही 45 वर्षावरील लोकांसाठी डोस शिल्लक आहेत. ते घेणे महत्वाचे असल्याचे डॉ. काकोडकर यांनी नमूद केले.
