औंध / वार्ताहर :
पटना (बिहार) येथे सुरू असलेल्या ज्युनियर नॅशनल चॅम्पियनशिप कुस्ती स्पर्धेमध्ये मांडवे ता. सातारा येथील मल्ल विजय जिजाबा डोईफोडे याने दमदार कामगिरीची नोंद करीत 77 किलो वजन गटामध्ये कांस्यपदक मिळवले. राष्ट्रीय पातळीवर जिल्ह्याचा झेंडा फडकावण्यात तो यशस्वी झाला आहे.
उंचपुऱ्या तगड्या विजयकडून सातारवासियांना मोठ्या अपेक्षा आहेत. कामगिरीचा मोठा टप्पा गाठण्यात तो अपयशी ठरला असला तरी रिपँचेसमध्ये कास्यपदकाची कमाई करून मांडवे गावचा नावलौकिक त्याने वाढवला आहे. विजय लोकनेते सदाशिवराव मंडलिक राष्ट्रीय ( SAI ) कुस्ती संकुल मुरगूड येथे प्रशिक्षक दादासाहेब लवटे, सुखदेव येराडकर यांच्या मार्गदर्शनाखाली सराव करीत आहे. त्याने मिळवलेल्या यशाबद्दल त्याचे मांडवे ग्रामस्थ आणि जिल्ह्यातील कुस्तीशौकिनांनी कौतुक केले आहे.
