ऑनलाईन टीम / मुंबई :
महाराष्ट्रात आतापर्यंत 786 पोलिसांना कोरोनाची बाधा झाली आहे. त्यामध्ये 88 पोलीस अधिकारी आणि 698 कर्मचाऱ्यांचा समावेश आहे. 76 कोरोनाबाधित पोलिसांनी कोरोनावर यशस्वी मात केली असून, त्यांना डिस्चार्ज देण्यात आला आहे. सध्या 75 अधिकारी आणि 628 पोलीस कर्मचाऱ्यांवर रुग्णालयात उपचार सुरू आहेत.
सात पोलिसांचा मृत्यू
राज्यात आतापर्यंत सात पोलीस योद्ध्यांचा कोरोनाने बळी घेतला आहे. मृतांमध्ये कुर्ला वाहतूक विभागाचे पोलीस नाईक शिवाजी नारायण सोनावणे, वाकोला पोलीस स्टेशनमधील हेड कॉन्स्टेबल चंद्रकांत पेंदूरकर, मुंबई पोलीस दलातील हेड कॉन्स्टेबल संदीप सुर्वे, पुण्याच्या फरासखाना पोलीस स्टेशनचे सहाय्यक पोलीस उपनिरीक्षक दिलीप पोपट लोंढे, सोलापूरच्या एमआयडीसी पोलीस स्टेशनचे सहाय्यक पोलीस उपनिरीक्षक ताजुद्दीन रहिमान शेख, नाशिक ग्रामीण पोलीस ठाण्यातील कॉन्स्टेबल साहेबराव झिप्रू आणि कुर्ला येथील एका सहायक पोलीस निरीक्षकाचा समावेश आहे.
लॉकडाऊनच्या काळात आतापर्यंत पोलिसांवर हल्ले झाल्याच्या 200 घटना आहेत. याप्रकरणी 732 जणांना अटक करण्यात आली आहे.
