सावंतवाडी
पोलीस परेड मैदान येथील जागेची पाहणी रविवारी विविध खात्याच्या अधिकाऱयांनी केली. पोलीस परेड मैदानाजवळील 18 गुंठे जागेची पाहणी करून जागा निश्चित करून नंतर आराखडा तयार केला जाणार असल्याची माहिती सार्वजनिक बांधकाम विभागाचे कार्यकारी अभियंता युवराज देसाई यांनी दिली.
यावेळी जिल्हा शल्यचिकित्सक डॉ. धनंजय चाकूरकर, तहसीलदार राजाराम म्हात्रे, उपजिल्हा रुग्णालयाचे वैद्यकीय अधीक्षक डॉ. उत्तम पाटील, बांधकाम विभागाचे अधिकारी अनिल आवटी, राजन चव्हाण आदी उपस्थित होते.
तत्कालीन पालकमंत्री दीपक केसरकर यांनी सावंतवाडीतील उपजिल्हा रुग्णालयाच्या आवारात मल्टिस्पेशालिटी रुग्णालय उभारण्याचे जाहीर करून त्याचे भूमिपूजनही केले होते. मात्र, जागेचा प्रश्न सुटला नव्हता. त्यानंतर खासदार विनायक राऊत यांनी मल्टिस्पेशालिटी रुग्णालयासाठी पोलीस परेड मैदानालगतची 18 गुंठे जागा योग्य असल्याचे सूचविले. त्याच आराखडा सादर करण्याचे आदेश प्रशासनाला दिले होते. त्यानुसार रविवारी बांधकामचे कार्यकारी अभियंता युवराज देसाई, तहसीलदार म्हात्रे, डॉ. चाकूरकर, डॉ. पाटील आदी अधिकाऱयांनी रविवारी पोलीस परेड मैदानाजवळील जागेची पाहणी केली. पोलिसांच्या सुरक्षा रक्षक प्रशिक्षण केंद्राच्या जागेसह मैदान व वसाहतीजवळील जागेची पाहणी केली. पाहणीनंतर जागा निश्चित केली जाईल व रुग्णालयाचा आराखडा तयार केला जाईल, असे देसाई यांनी स्पष्ट केले.
