प्रतिनिधी / कोल्हापूर
गोकुळचे ग्रामीण विकासामध्ये मोठे योगदान आहे. अशा संस्थेचा विस्तार होणे काळाची गरज आहे व गोकुळच्या प्रस्तावित भोकरपाडा मधील भुखंडा संदर्भातील प्रस्ताव विनाविलंब मंजुर करु अशी ग्वाही उद्योगमंत्री सुभाष देसाई यांनी दिली. चेअरमन विश्वास पाटील यांच्या नेतृत्वाखालील संचालक मंडळाने गुरुवारी उद्योग मंत्री देसाई यांची मुंबई येथील निवासस्थानी भेट घेतली. यावेळी त्यांनी वरील आश्वासन दिले. यावेळी ग्रामविकास मंत्री हसन मुश्रीफ, पालकमंत्री सतेज पाटील प्रमुख उपस्थित होते.
याभेटी प्रसंगी मंत्री सुभाष देसाई म्हणाले, गोकुळने दूध उत्पादक शेतकऱयांपासून ग्राहकापर्यंत निर्माण केलेले जाळे आणि त्यातील व्यवस्थापन कौशल्य हे कौतुकास्पद आहे. गोकुळ ही संस्था सामाजिक कार्यामध्ये अग्रेसर आहे. दूग्ध व्यावसायाच्या माध्यमातून ग्रामीण भागाचा कायापालट करताना दूध उत्पादक शेतकयांची हित साधण्याचे प्रभावी काम गोकुळने आपल्या कार्यक्षेत्रामध्ये उत्तम प्रकारे केलेले आहे. म्हणूनच गोकुळचे ग्रामीण विकासामध्ये मोठे योगदान आहे. अशा संस्थेचा विस्तार होणे काळाची गरज आहे व गोकुळच्या प्रस्तावित भोकरपाडा एम.आय.डी.सी मधील भुखंडा संदर्भातील सर्व प्रकारची मदत करु.
यावेळी संघाचे चेअरमन विश्वास पाटील यांनी आमचा संघ हा कोल्हापूर जिह्यातील पाच लाख दूध उत्पादक शेतकऱयांच्या सहयोगाने सहकारी तत्वावर दुग्धव्यवसाय करणारी संस्था आहे. दूध उत्पादक शेतकऱयांचे जीवनमान उंचावणेचे काम संघ करीत आहे. सध्या मुंबई मध्ये दररोज 8 लाख 50 हजार लिटर्स प्रतिदिन इतकी मागणी आहे. व मुंबई शहरामध्ये दूधाच्या विक्रीमध्ये सातत्याने वाढ होत आहे. या सर्वबाबीचा विचार करून व भविष्याच्या दृष्टीने संघाचे विस्तारीकरण होणे गरजेचे आहे. भोकरपाडा येथील भूखंडा संदर्भा तांत्रिकदृष्ट्या येणाऱ्या सर्व अडचणी लवकरात लवकर दूर करून संघास भुखंड प्रदान करण्यासाठी सकारात्मक चर्चा झाली असे म्हणाले.
यावेळी ग्रामविकास व कामगार मंत्री हसन मुश्रीफ, पालकमंत्री कोल्हापूर जिल्हा सतेज पाटील, गोकुळचे चेअरमन विश्वास पाटील, माजी चेअरमन व जेष्ठ संचालक अरूण डोंगळे, संचालक बाबासाहेब चौगले, शशिकांत पाटील चुयेकर, सुजित मिणचेकर, अंजना रेडेकर, मुंबई शाखेचे व्यवस्थापक दयानंद पाटील, सिव्हीलचे व्यवस्थापक प्रकाश आडनाईक उपस्थित होते.
