सरपंच शिरीषकुमार जाधव यांच्या प्रयत्नाला यश
प्रतिनिधी / वारणानगर
बहिरेवाडी ता. पन्हाळा येथे २५ वर्षापासून मंजूर असलेले प्राथमिक आरोग्य उपकेंद्र जागेअभावी रखडले होते. या उपकेंद्रास शासनाने गायरानमधील जागा मंजूर केल्याने गावामध्ये दवाखान्याचा प्रलंबित प्रश्न पूर्णत्वास गेल्याची माहिती लोकनियुक्त सरपंच शिरीषकुमार जाधव यानी दिली.
१९९६ साली पन्हाळा पंचायत समितीचे तात्कालीन सभापती व गावचे सुपूत्र स्व. विश्वनाथ जाधव-सरनाईक (दादा) यांनी बहिरेवाडी गावास प्राथमिक आरोग्य उपकेंद्र मंजूर केले होते पण गेले कित्येक वर्षांपासून उपकेंद्राचे काम जागेअभावी रखडले होते. गावामधील नागरिकांना दवाखान्यात जाण्यासाठी ४ ते ५ किलोमीटर लांब जावे लागायचे याचा विचार करून गावचे लोकनियुक्त सरपंच शिरीषकुमार जाधव व त्यांच्या सहकाऱ्यांनी विषेश पाठपुरावा करून गावामध्ये प्राथमिक आरोग्य केंद्राचा जागेचा प्रश्न अखेर मार्गी लावण्यासाठी केलेल्या प्रयत्नाला यश आले.
आमदार डॉ. विनय कोरे, वारणा दूध संघाचे संचालक एच. आर. जाधव यांच्या विषेश प्रयत्नातून जागेचा प्रश्न सोडवला गेला. यामुळे गावामध्ये आनंदाचे वातावरण निर्माण झाले आणि गेले कित्येक वर्षांपासूनची वणवण आता थांबणार असल्याचे सरपंच जाधव यानी सांगितले. बहिरेवाडी प्राथमिक आरोग्य उपकेद्रास जागा मंजूर झाल्याचा फटाके फोडून आनंदोत्सव साजरा करण्यात आला यावेळी गावचे उपसरपंच तानाजी सरनाईक, ग्रामपंचायत सदस्य, ग्रामसेवक, ग्रामस्थ मोठ्या संख्येने उपस्थित होते.
