पाटण तालुक्यातील आबदारवाडी येथील घटना, अज्ञातावर गुन्हा
वार्ताहर/ विहे
कराड-पाटण रोडवरील आबदारवाडी (निसरे फाटा, ता. पाटण) येथे धायटा नावाच्या शिवारात शिकारीसाठी लावलेल्या फासकीत अडकून धडपडून चार वर्षाच्या मादी बिबटय़ाचा मृत्यू झाल्याची घटना उघडकीस आली. याबाबत पाटण वनपरिक्षेत्रात घटनेची नोंद करण्यात आली आहे. मृत बिबटय़ाचे शवविच्छेदन करण्यात आले असून कमरेला बसलेल्या फासामुळे बिबटय़ाचा मृत्यू झाल्याचे निष्पन्न झाले आहे. वनविभाग कर्मचाऱयांनी जंगल क्षेत्रात मृत बिबटय़ाचे दहन केले. या प्रकरणी अज्ञात व्यक्तीविरूद्ध वन परिक्षेत्रात गुन्हा नोंद केला आहे.
याबाबत पाटण वनपरिक्षेत्राकडील माहितीनुसार, मल्हारपेठ परिमंडळात आबदारवाडी गावच्या हद्दीत रघुनाथ शिंदे यांच्या शेतात काल सकाळी मृत अवस्थेत बिबटय़ा आढळून आला. संबंधित शेतकऱयाने मल्हारपेठ पोलीस स्टेशनला याबाबत माहिती दिली. त्यानंतर सहाय्यक पोलीस निरीक्षक भापकर यांनी पाटण वनपरिक्षेत्रास घटनेची माहिती कळविली. त्यानंतर संबंधित विभागाच्या अधिकाऱयांनी घटनास्थळी येऊन पाहणी केली.
यावेळी बिबटय़ाच्या कमरेला फास दिसून आला. यावरून बिबटय़ा मादी फासकीत अडकून मृत्यू झाल्याचे निदर्शनास आले. अज्ञात शिकाऱयाने शिकारीची फासकी लावली होती. यामध्ये अंदाजे चार वर्षे वयाचा मादी बिबटय़ा अडकला व त्याचा मृत्यू झाला. वन कर्मचाऱयांनी मादी बिबटय़ाची पिल्ले शोधण्याचा प्रयत्न केला. मात्र पिले सापडली नाहीत. वनविभाग कर्मचाऱयांनी जंगल क्षेत्रात मृत बिबटय़ाचे दहन केले.
मृत बिबटय़ाचे शवविच्छेदन पाटण पशुधन अधिकारी पाटणे यांनी केले. मृत बिबटय़ाचे अवयव सुस्थितीत असल्याची माहिती पाटण वनक्षेत्रपाल एल. व्ही. पोतदार यांनी दिली.
