मुख्यमंत्री असताना केली होती पायाभरणी; प्रकल्पाचे केले कौतुक
प्रतिनिधी/ कराड
माजी मुख्यमंत्री, आमदार पृथ्वीराज चव्हाण यांनी तिकीट खरेदी करून नागपूर मेट्रोमधून प्रवास केला. त्यांनी यावेळी मेट्रो प्रकल्पचे कौतुक करीत नागपूरने आंतरराष्ट्रीय शहराकडे झेप घेतल्याचे यावेळी सांगितले.
पृथ्वीराज चव्हाण हे मुख्यमंत्री असताना त्यांच्याच कार्यकाळात पुणे व नागपूर मेट्रोची पायाभरणी केली होती. त्यांनी निधीही मंजूर केला होता. यावर्षी हिवाळी अधिवेशनाच्या निमित्ताने नागपूरमध्ये आलेल्या चव्हाण यांनी महाराष्ट्र मेट्रोच्या मेट्रो भवन कार्यालयास भेट दिली. मेट्रोमधून प्रवासही केला.
चव्हाण यांनी नागपूर शहरातील सीताबर्डी ते शंकरनगर असा मेट्रोमधून प्रवास केला. तत्पूर्वी त्यांनी मेट्रोच्या मुख्यालयास भेट दिली. येथे महा मेट्रोचे व्यवस्थापकीय संचालक डॉ. ब्रिजेश दीक्षित यांनी त्यांचे स्वागत केले. यावेळी डॉ. दीक्षित यांनी चव्हाण यांना नागपूर व पुणे मेट्रोची माहिती दिली. वर्धा मार्गावरील डबल डेकर पूल गिनीज वर्ल्ड रेकॉर्ड बुकमध्ये समाविष्ट झाल्याचे त्यांनी यावेळी सांगितले. आ. चव्हाण यांनी व्हिजिटर बुकमध्ये नागपूर मेट्रो प्रकल्पचे डिझाईन सुंदर असून शहर आंतरराष्ट्रीय दिशेने पुढे जात असल्याचे नोंद केली. यावेळी त्यांच्यासमवेत माजी मंत्री राजेंद्र मुळक तसेच महा मेट्रोचे संचालक अनिल कोकाटे, कार्यकारी संचालक उदय बोरवणकर उपस्थित होते.
