प्रतिनिधी / नागठाणे :
गेल्या काही महिन्यांपासून नागठाणे(ता.सातारा) गावात कोरोना पॉझिटिव्ह पेशंटची संख्या मोठ्या प्रमाणात वाढली. अनेकदा पोलीस व ग्रामपंचायतीने सूचना देऊनही अनेकजण विविध कारणांच्या निमित्ताने घराबाहेर पडून प्रशासनाला गुंगारा देत होते. बुधवारी सकाळी अखेर प्रशासनाने विनाकारण भटकणाऱ्यांची कोरोना चाचणी करण्यास सुरुवात केली. नागठाणे ग्रामपंचायत,बोरगाव पोलीस व प्राथमिक आरोग्य केंद्राने ही धडक मोहीम राबवली. गावातील मारुती मंदिर परिसर, बेघर वस्ती, सासपडे चौक व मुख्य महामार्ग चौक येथे ही मोहीम राबवली गेली. यावेळी विनाकारण बाहेर भटकणाऱ्या १७ जणांची कोरोनाची अँटिजिन टेस्ट करण्यात आली.
सरपंच डॉ.रुपाली बेंद्रे, उपसरपंच अनिल साळुंखे, ग्रामसेवक सचिन पवार,बोरगाव पोलीस ठाण्याचे सपोनि डॉ.सागर वाघ, पोलीस उपनिरीक्षक वर्षा डाळींबकर, प्राथमिक आरोग्य केंद्राचे कर्मचारी यांनी ही धडक मोहीम राबवली. लॉकडाऊन सुरू असेपर्यंत ही मोहीम सुरूच असणार असून, तपासणीत जे पॉझिटिव्ह आढळणार आहेत त्यांची रवानगी थेट कोविड सेंटरला रवानगी करण्यात येणार असल्याचे यावेळी प्रशासनातर्फे सांगण्यात आले.
