दोन हजार रुपयाच्या नोटेची छपाई बंद करण्याचा निर्णय नाही?

नवी दिल्ली : देशातील दोन हजार रुपये मूल्यवर्ग नोटेची छपाई बंद करण्यासंदर्भात आताच कोणताही निर्णय घेण्यात आला नसल्याची माहिती सरकारकडून शनिवारी देण्यात आली आहे. लोकसभेत एका लिखित प्रश्नाला उत्तर देताना वित्त राज्यमंत्री अनुराग ठाकुर यांनी यासंदर्भात माहिती दिली आहे. तसेच कोणत्याही विशेष मूल्यवर्गातील नोटांच्या छपाईचा निर्णय हा भारतीय रिझर्व्ह बँकेच्या सल्ल्यानंतर घेणार असल्याची माहिती दिली. वित्त वर्ष  2019-20 आणि  2020-21 मध्ये नोटांची छपाई करण्यात आलेली नाही. तसेच छपाईसाठी कोणत्याही प्रकारचे मागणी पत्रही पाठविण्यात आले नसल्याचे मंत्री ठाकुर यांनी स्पष्ट केले आहे. 31 मार्च 2020 पर्यंत दोन हजार मूल्य असणाऱया 27,398 नोट चलनात असल्याची माहिती आहे. तर मार्च 2019 पर्यंत हाच आकडा 32,910 इतका राहिलेला आहे. केंदीय मंत्र्याने आरबीआयचा दाखला देत कोरोना कालावधीत देशभरात लागू करण्यात आलेल्या लॉकडाऊनमुळे नोटांची छपाई करण्यात आली नसल्याचे सांगितले आहे. आगामी काळात केंद्र आणि राज्य सरकारच्या मार्गदर्शनानुसार वेगवेगळय़ा पातळीवर छपाई सुरु करण्यात येणार असल्याचे संकेत नोंदवले आहेत. तर भारतीय रिझर्व्ह बँक नोट मुद्रण प्रायव्हेट लिमिटेडच्या माहितीनुसार 23 मार्च 2020 रोजी नोटा छपाई बंद करण्यात आल्या होत्या. तसेच 4 मे 2020 मध्ये पुन्हा सुरु करण्यात आल्याची माहिती होती.