अनगोळ नाक्यावर घडला अपघात
प्रतिनिधी /बेळगाव
भरधाव ट्रकने मोटारसायकलला ठोकरल्याने अयोध्यानगर, टिळकवाडी येथील एका युवकाचा मृत्यू झाला. शनिवारी सायंकाळी अनगोळ नाक्मयाजवळ हा अपघात घडला. वाहतूक दक्षिण विभाग पोलीस स्थानकात या अपघाताची नोंद झाली आहे.
अमर सीताराम पवार (वय 31) असे या दुर्दैवी युवकाचे नाव आहे. त्याच्या पश्चात वृद्ध आई-वडील, चार बहिणी, भावोजी असा परिवार आहे. अमर हा एकुलता मुलगा होता. तो लोकमान्य को-ऑप. मल्टिपर्पज सोसायटी उद्यमबाग शाखेचा कर्मचारी होता.
के. ए. 47, 1582 क्रमांकाच्या ट्रकने मोटारसायकलला ठोकरल्याने झालेल्या अपघातात अमर गंभीर जखमी झाला. शनिवारी सायंकाळी 5.20 वाजण्याच्या सुमारास ही घटना घडली. त्याला खासगी इस्पितळात दाखल करण्यात आले. उपचाराचा उपयोग न होता रात्री उशिरा त्याचा मृत्यू झाला. ट्रकचालक मारुती तारिहाळकर याच्यावर एफआयआर दाखल करण्यात आला आहे. पोलीस निरीक्षक मंजुनाथ नायक पुढील तपास करीत आहेत.
