पंतप्रधानांची उपस्थिती -पुनर्निर्माणाचे काम पूर्ण
नवी दिल्ली / वृत्तसंस्था
ऐतिहासिक जालियनवाला बाग स्मारकाचे शनिवारी सायंकाळी एका छानदार समारंभात राष्ट्रार्पण करण्यात आले. पंतप्रधान नरेंद्र मोदी आणि पंजाबचे मुख्यमंत्री कॅप्टन अमरिंदर सिंग यांच्या व्हर्च्युअल उपस्थितीत हा सोहळा पार पडला. कोरोनामुळे गेले दीड वर्ष हे स्मारक सर्वसामान्य लोकांसाठी बंद होते. मात्र आता उद्घाटन झाल्यावर ते सर्वांसाठी खुले झाले आहे.
गेल्या काही दिवसांपासून सुरू असलेले पुनर्निर्माणाचे काम पूर्ण झाल्यानंतर हे स्मारक देशाला समर्पित करण्यात आले आहे. या पुनर्निर्माण परिसराचे उद्घाटन पंतप्रधान व्हर्च्युअल कार्यक्रमात करण्यात आले. यात मानचिन्ह, थ्रीडी चित्रण, चार संग्रहालये यांचा समावेश आहे. जालियनवाला बाग परिसरात एक थिएटर उभारले गेले असून त्यात एकावेळी 80 प्रेक्षक बसू शकतात. येथे डिजिटल डॉक्मयुमेंटरी पाहण्याची संधी लोकांना लाभणार आहे.
पंजाब सरकारने 20 कोटी रुपये खर्चून या ऐतिहासिक स्थळाचे पुनर्निर्माण केले आहे. गतवषीच हे काम पूर्ण होणार होते मात्र कोरोनामुळे काम काही काळ बंद राहिले होते. जालियनवाला बागेमधील विहीर दुरुस्त करण्यात आली आहे. ब्रिटीश सैनिकांनी या ठिकाणी जमलेल्या निरपराध लोकांवर अचानक गोळीबार सुरु करताच जीव वाचविण्यासाठी अनेकांनी याच विहिरीत उडी घेतल्यानंतर अनेकांचे प्राण गेले होते. या विहिरीच्या मागच्या बाजूला असलेल्या भिंतीवर आजही बंदुकीच्या गोळय़ांच्या खुणा पाहायला मिळतात.
