ऑनलाईन टीम / नवी दिल्ली :
दिल्लीच्या गाझीपूरमधील फुल मार्केटमध्ये स्फोटकांनी भरलेली एक बॅग आढळून आल्याने खळबळ उडाली. या बॅगमध्ये आयईडी बॉम्ब होते. बॉम्बशोधक पथकाने तात्काळ घटनास्थळी धाव घेत मार्केटजवळील एका रिकाम्या शेतात खड्डा खोदून ही स्फोटके निकामी केली.
दिल्ली पोलिसांनी सांगितले की, सकाळी 10.50 वाजता एका पीसीआर कॉलवर गाझीपूर फुल मार्केटमध्ये एका बेवारस बॅगेत बॉम्ब असल्याची माहिती मिळाली. त्यानंतर तात्काळ बॉम्बशोधक पथकाला पाचारण करण्यात आले. दिल्ली पोलिसांच्या स्पेशल सेलचीही टीम घटनास्थळी दाखल झाली. पोलिसांना मिळालेल्या बॅगमध्ये स्फोटके आणि आयईडी पेरण्यात आले होते. बॉम्बनाशक पथकाने एका शेतात खड्डा खोदून हे बॉम्ब निकामी केले. या घटनेनंतर संपूर्ण परिसराची तपासणी केली जात आहे. दरम्यान, या प्रकरणी एक्सप्लोजिव्ह कायद्याअंतर्गत दिल्ली पोलिसांच्या विशेष सेलमध्ये गुन्हा दाखल करण्यात आला आहे.
