पुणे : बारामती तालुक्यात कोरोनाचा प्रादुर्भाव वाढत आहे. पुढील काही दिवसांत कोरोनाचा प्रादुर्भाव नियंत्रणात न आल्यास कडक निर्बंध लावण्याचा विचार करावा लागेल, असा इशारा उपमुख्यमंत्री अजित पवार यांनी रविवारी आढावा बैठकीत दिला.
बारामती येथील विद्या प्रतिष्ठानच्या सभागृहात उपमुख्यमंत्री पवार यांच्या अध्यक्षतेखाली कोरोना विषाणू निर्मूलन आढावा बैठकीचे आयोजन करण्यात आले होते. त्यावेळी ते बोलत होते. या वेळी नगराध्यक्ष पौर्णिमा तावरे, पंचायत समितीच्या सभापती नीता फरांदे, अपर पोलीस अधीक्षक मिलिंद मोहिते, महावितरणचे मुख्य अभियंता सुनील पावडे आदींसह विविध विभागाचे अधिकारी उपस्थित होते.
पवार म्हणाले, सद्यस्थितीत बारामती तालुक्यात कोरोनाच्या रुग्णांची संख्या वाढतच आहे. कोरोनाचा प्रादुर्भाव नियंत्रणात न आल्यास कडक निर्बंध लागू करण्याचा विचार करावा लागेल. ज्याठिकाणी कोरोनाचे रुग्ण जास्त आहेत, त्या ठिकाणी हॉटस्पॉट घोषित करा. ते करताना नगरसेवकांना विश्वासात घ्या. ग्रामीण भागात सर्वेक्षण करण्यावर भर द्या, पुणे जिल्हा परिषदेने ज्याप्रकारे कोरोना अपडेटसाठी तयार केले आहे, त्याच धर्तीवर बारामती तालुक्यासाठीही ॲप तयार करा. जेणेकरून कोरोनाची सद्यस्थिती आणि बेडच्या उपलब्धतेबाबत नागरिकांना माहिती मिळणे सुलभ होईल. अधिकाऱ्यांनी समन्वयाने काम करावे. नागरिकांपर्यंत पोहचून कोरोनाबाबत जनजागृती करावी, ऑक्सीजन बेडची कमतरता भासणार नाही, याची दक्षता घ्यावी.
