कुपवाड / प्रतिनिधी
रात्री जेवण करून पतीसोबत रस्त्यावर फेरफटका मारण्यास गेलेल्या एका महिलेच्या हातातून दुचाकीवरून आलेल्या अज्ञाताने हिसडा मारून मोबाईल पळविल्याची घटना उघडकीस आली आहे. याबाबत कुपवाड पोलिसात नोंद झाली असून पोलिसांनी अज्ञात चोरट्याविरोधात गुन्हा दाखल केला आहे.
याबाबत सोनाली प्रकाश लांडगे (वय ३१, रा.विवेकानंद सोसायटी कुपवाड) यांनी कुपवाड पोलिसात फिर्याद दिली आहे. पोलिसांनी दिलेल्या माहितीनुसार, सोनाली लांडगे शनिवारी रात्री सव्वा नऊच्या सुमारास जेवण करून पतीसोबत सूतगिरणीहुन यशवंतनगरकडे जाणाऱ्या मुख्य रस्त्यावर फेरफटका मारण्यास गेल्या होत्या.
यावेळी मोबाईलवर बोलत असताना सूतगिरणीकडून दुचाकीवरून आलेल्या अज्ञात चोरट्याने सोनाली यांच्या हातातून मोबाईल हिसडा मारून धूम ठोकली. यावेळी सोनाली व त्यांच्या पतीने आरडाओरडा केला. तोपर्यंत मोबाइल चोरटा पसार झाला होता. याबाबत लांडगे यांनी कुपवाड पोलिसात धाव घेऊन फिर्याद दिली. त्यानुसार पोलिसांनी मोबाईल चोरणाऱ्या अज्ञातांविरोधात गुन्हा दाखल केला.
