आमदार वैभव नाईक यांचा गंभीर आरोप : सातबारावर वारस नोंदीसाठी मागतात पैसे : तहसीलदारांचे वेधले लक्ष
तलाठय़ापेक्षा काही कोतवाल देतात जास्त त्रास!
दोन वर्षांपासूनच्या वारस नोंदी अद्याप नाही!
सातबारावरील चुकीच्या नावांची दुरुस्ती लवकर करा!
वार्ताहर / कुडाळ:
सातबारावर वारस नोंद करण्यासाठी मंडळ अधिकारी व तलाठी वेळ काढून लोकांना नाहक त्रास देतात. काहीजण नोंदीसाठी पैसे मागतात. तलाठय़ापेक्षा काही कोतवालच जास्त हस्तक्षेप करतात, असा आरोप आमदार वैभव नाईक यांनी केला आहे. दीड-दोन वर्षे वारस नोंदी होत नाहीत, अशा लोकांच्या तक्रारी आहेत. वारस नोंदीसाठी आलेल्या अर्जाच्या नोंदी 15 एप्रिलपर्यंत पूर्ण करण्याचे आदेश मंडळ अधिकारी व तलाठय़ांना द्या, अशी सूचना त्यांनी कुडाळ तहसीलदार अमोल पाठक यांना केली. ऑनलाईन सातबारामध्ये चुकीच्या नावाची नोंद झाल्याने त्यांची दुरुस्ती करून देण्यास कारणे सांगितली जातात, याकडे उपस्थितांनी लक्ष वेधले.
सातबारावरील वारस व फेरफार नोंदी करण्यास विलंब होत असल्याच्या तक्रारी नागरिकांनी आमदार नाईक यांच्याकडे केल्या होत्या. त्यानुसार नाईक यांनी शुक्रवारी तहसीलदार पाठक यांची भेट घेऊन चर्चा केली. उपसभापती जयभारत पालव, अतुल बंगे, विकास कुडाळकर, नायब तहसीलदार दाभोलकर तसेच शिवसेना तालुकाप्रमुख राजन नाईक, तालुका संघटक बबन बोभाटे, शहरप्रमुख संतोष शिरसाट, गंगाराम सडवेलकर, रुपेश पावसकर, सुशील चिंदरकर, किरण शिंदे, बाळू पालव, योगेश धुरी आदी उपस्थित होते.
वारस तपास नोंद करण्यासाठी मंडळ अधिकारी व तलाठी वेळ काढतात. खातेदाराने अर्ज दिल्यानंतर तीन महिन्यांत ही नोंद झाली पाहिजे. अनेक नोंदी प्रलंबित आहेत. लोकांची कामे होत नाहीत. याचा त्रास स्थानिक लोकप्रिनिधींना होतो. नोंदीसंदर्भात त्या-त्या मंडळ अधिकाऱयांना आढावा घ्यायला सांगा, अशी सूचना आमदार नाईक यांनी पाठक यांना केली. दोन वर्षांपासूनच्या वारस नोंदी अद्याप करण्यात आलेल्या नाहीत. मात्र, काही नंतर आलेल्या नोंदी करण्यात आल्या, असा आरोप उपस्थितांनी केला.
सातबारा ऑनलाईन करताना मूळ नावे चुकलेली आहेत. मूळ प्रत पाहून सातबारा दिला जात नाही, तर चुकीची नावे असलेला ऑनलाईन सातबारा दिला जातो. चूक कर्मचाऱयांची आहे. परंतु दुरुस्ती करून सातबारा देत नाहीत, याकडे ग्रामस्थ व लोकप्रतिनिधींनी लक्ष वेधले. त्यावर नाईक यांनी तलाठय़ांकडे नावांच्या चुकीबाबत अर्ज द्या, असे ग्रामस्थांना सांगितले. साताबारावरील चुकीच्या नावांची दुरुस्ती करण्याबाबत लवकर कार्यवाही करा, असे पाठक यांना त्यांनी सांगितले.
नेटवर्कची समस्या मोठय़ा प्रमाणात आहे. सिंधुदुर्गातील भौगोलिक परिस्थितीमुळे ही अडचण आहे. क्रमवार वारसाच्या नोंदी कराव्या लागतात. सामाईक सातबारा जास्त असल्याने नावे खूप असतात. प्रत्येकी 40-50 सातबारा असतात. त्यामुळे नोंदी करण्यास विलंब होतो. या नोंदीबाबत आढावा घेतला जाईल, असे पाठक यांनी सांगितले. 25 हेक्टर क्षेत्र असलेल्यांच्या वारस नोंदी होत नाहीत, असे वसोली सरपंच अजित परब यांनी सांगितल्यानंतर कार्यवाही करण्याची ग्वाही पाठक यांनी दिली.
थम लागत नाही, त्यांना धान्य दिले जात नाही. त्यासाठी ऑफलाईन पर्याय ठेवावा. शिधापत्रिकेवर पाच नावे असतील आणि त्यातील एका सदस्याचा थम लागत नसेल, तर त्याला धान्य दिले जात नाही, याकडे लक्ष वेधण्यात आले. धान्याची उचल पाच-सहा महिने केली नाही, अशांना तूर्तास शासनाने अपात्र ठरविले आहे. त्यांना अर्ज सादर करून सबळ कारणे द्यावी लागणार आहेत. त्यासाठीचे अर्ज व हमीपत्र नमुना तयार केला आहे, असे पाठक यांनी सांगितले.
संजय गांधी निराधार योजनेतील लाभार्थ्यांना दरवषी उत्पन्नाच्या दाखल्याची अट शिथील करावी, अशी मागणी अजित परब यांनी केली. वरिष्ठ पातळीवरून हा प्रश्न सोडविण्यासाठी प्रयत्न करणार असल्याचे नाईक यांनी सांगितले. राजन नाईक, कुंदे सरपंच सचिन कदम, संतोष शिरसाट, विकास कुडाळकर, जयभारत पालव, अतुल बंगे, संदीप राऊळ, सडवेलकर, पालव, महादेव धुरी यांनी चर्चेत भाग घेतला.
पायवाटा, रस्ताप्रश्नी प्रांताधिकाऱयांशी चर्चा
ग्रामपंचायत हद्दीतील पायवाटा व रस्ताप्रश्नी आमदार नाईक यांनी कुडाळ प्रांताधिकारी वंदना खरमाळे यांची भेट घेऊन चर्चा केली. ग्रा. पं. हद्दीतील पूर्वापार पायवाटा आहेत, त्यांची नोंद 23 नंबरला आहे, तर काही रस्ते व पायवाटा नकाशात आहेत. मात्र, काहींकडून हे मार्ग बंद केले जातात. नकाशात असेल, तर नोंद करायला संमती देण्यास विरोध करतात. या प्रश्नांबाबत स्थानिक पातळीवर ग्रामस्तरीय समिती नेमून या पायवाटा व रस्ते ताब्यात घेण्याचे अधिकार आहेत. हा विषय प्रांताधिकाऱयांच्या अधिपत्याखाली येत असल्याने ग्रामस्थ व लोकप्रतिनिधींनी आमदार नाईक यांचे लक्ष वेधले. तेव्हा त्यांनी सौ. खरमाळे यांच्याशी चर्चा केली. त्यावर आपण या संदर्भात गटविकास अधिकाऱयांना ग्रामपंचायत स्तरावरून ग्रामस्तरीय समिती नेमण्याबाबत पत्र दिले असल्याचे खरमाळे यांनी सांगितले.
