वृत्तसंस्था/ श्रीनगर
जम्मू-काश्मीरमध्ये दहशतवादाविरोधातील एका मोहिमेमध्ये पोलिसांना मोठे यश मिळाले आहे. रविवारी अनंतनाग जिल्हय़ामध्ये दहशतवादी लपून बसल्याची माहिती पोलिसांना मिळाली होती. यावेळी झालेल्या चकमकीत चार दहशतवाद्यांचा खात्मा करण्यात आला. एसओजी, 164-सीआरपीएफ आणि 19-आरआर या तुकडय़ांच्या जवानांनी मिळून ही मोहीम संयुक्तपणे राबवली. जम्मू-काश्मीर पोलिसांनी ट्विटरवर याबाबतची माहिती दिली. पोलिसांनी संपूर्ण भागाची नाकाबंदी केली असून, शोधमोहीम सुरू असल्याची माहिती अधिकाऱयांनी दिली. ही मोहीम वत्रिगाम आणि अनंतनाग परिसरामध्ये राबविण्यात आली. या दरम्यान, जैश-ए-मोहम्मद या दहशतवादी संघटनेच्या एका दहशतवाद्यास पकडण्यात जवानांना यश आले. काश्मीरच्या सोपोर भागात जवानांनी ही कारवाई केली.
