कदम बंधूंचा टिकटॉक व्हीडिओ व्हायरल
प्रतिनिधी / मसुरे:
कलाकार हा नेहमी आपल्या कलेवर प्रेम करत असतो. कलाकार कधीही शांत बसत नाही. तो नेहमीच इतरांचे मनोरंजन करण्यासाठी प्रयत्नशील असतो. मग तो क्वारंटाईनमधील 14 दिवसांचा शाळेतील मुक्काम असेना का? असेच स्वत: बरोबरच इतरांचेही मनोरंजन करताहेत, ते कांदळगाव येथील सुरज भरत कदम व सुनील वसंत कदम हे दोघे चुलत बंधू. त्यांनी ‘टिक टॉक’च्या माध्यमातून बनविलेले व्हीडिओ चांगलेच व्हायरल झाले असून दशावताराच्या माध्यमातून कोरोनाच्या निगेटिव्ह वातावरणात या दोघांनी दाखविलेली सकारात्मकता शाळेत कसे राहणार? असा प्रश्न पडलेल्या अनेक चाकरमान्यांसाठी प्रेरणादायी अशीच आहे.
वडाळा व कल्याण येथे अडकून पडलेले हे भाऊ मोटारसायकलने गावी कांदळगाव येथे आले. तेथे ते 14 दिवसांसाठी संस्थात्मक विलगीकरण असल्याने ओझर विद्यामंदिर येथे मुक्कामाला आहेत. सुनील हा ‘गेले भजनाक पोचले लग्नाक’ या मालवणी नाटकात भूमिका करतो. ओझर विद्यामंदिर येथे शिक्षण घेतल्याने शाळे प्रती सामाजिक भावनेतून प्रथम सर्व परिसर तेथील सर्वांनी साफ केला. क्वारंटाईन ही कोणती शिक्षा नसून ही विद्यामंदिरांची सेवा करण्याची संधी असल्याचे सुनील म्हणाला. क्वारंटाईनमध्ये करमणुकीचे साधन म्हणून फक्त मोबाईलच आहे. याच मोबाईलचा वापर करून सोशल डिस्टन्सिंग पाळून शॉर्ट व्हिडिओ बनवून मनोरंजन करण्याचा प्रयत्न त्यांनी केला आहे.
या 14 दिवसांत आमचे एक कुटुंब तयार झाले आहे. ग्रामपंचायत आणि गावातील काही ग्रामस्थांनी खूप मदत केल्याचे सुरज कदम म्हणाले. क्वारंटाईन कालावधीत ओझर विद्यामंदिर येथे वास्तव्यास असलेल्या कदम बंधूंनी विविध नृत्य प्रकार, टिकटॉक व्हिडिओ बनविले आहेत. त्यांचे हे व्हीडिओ समाज माध्यमातून चांगल्या प्रतिक्रिया मिळवित असल्याचे दिसत आहे.
