बेंगळूर/प्रतिनिधी
कर्नाटकात कोरोना बाधितांची संख्या कमी कमी होताना दिसत आहे. शनिवारी बाधित रुग्णांच्या संख्येत घट झाली. राज्यात शनिवारी १,५२२ जणांना कोरोनाची लागण झाल्याचे निष्पन्न झाले. शुक्रवारच्या तुलनेत शनिवारी घरी परतणाऱ्या रुग्णांची संख्या जास्त होती. शनिवारी राज्यात २,१३३ रुग्णांनी कोरोनावर विजय मिळवत रुग्णालयातून डिस्चार्ज मिळविला. तसेच राज्यात विविध जिल्ह्यातील १२ जणांचा कोरोनाने बळी घेतला. दरम्यान राज्यात उपचारात असणाऱ्या रुग्णांची संख्या कमी होऊन ती २४७५७ वर पोहोचली आहे. तर आतापर्यंत ११,७५० जणांचा बळी गेला आहे.
दरम्यान राज्यात कोरोना बाधितांची सर्वाधिक संख्या बेंगळूर शहरी जिल्ह्यात आहे. शुक्रवारच्या तुलनेत शनिवारी जिल्ह्यात बाधित रुग्णांच्या संख्येत घट झाली. जिल्ह्यात ७१९ जणांना कोरोनाची लागण झाली. तर घरी परतणाऱ्या रुग्णांची संख्याही शुक्रवारच्या तुलनेत जास्त होती. जिल्ह्यात १,४२९ लोक कोरोनावर विजय मिळवत घरी परतले. जिल्ह्यात सध्या १८,३६६ रुग्ण उपचारात आहेत. शनिवारी कोरोनाने ७ जणांचा मृत्यू झाला आहे. जिल्हयात आतापर्यंत ४,१२१ जण कोरोनामुळे मृत्य पावले आहेत.
