एक-दोन दिवसात खातेवाटप : बोम्माई

बेंगळूर : नूतन मंत्र्यांना कोणते खाते मिळणार, याकडे संपूर्ण राज्याचे लक्ष लागून राहिले आहे. याविषयी प्रतिक्रिया देताना मुख्यमंत्री बसवराज बोम्माई यांनी, एक-दोन दिवसात खातेवाटप करण्यात येईल, असे सांगितले आहे. दरम्यान, आतापासूनच वजनदार खाते मिळविण्यासाठी मंत्र्यांमध्ये चढाओढ सुरू झाली आहे. बेंगळुरातील राजभवनमध्ये नूतन मंत्र्यांचा शपथविधी पार पडल्यानंतर पत्रकार परिषदेत ते बोलत होते. कोरोनाची तिसरी लाट रोखणे, पूरग्रस्त भागात मदतकार्य हाती घेण्यासाठी मंत्र्यांवर जबाबदारी सोपविण्यात आली आहे. स्थानिक पातळीवरच पूरग्रस्तांना मदत देण्याची कार्य सुरू आहे. गुरुवारपासूनच जिल्हय़ांचा दौरा हाती घेऊन यासंबंधीची कामे हाती केली जाणार आहे. कोणत्याही मंत्र्याने अमुक खाते हवे, अशी मागणी केलेली नाही. प्रत्येकाला योग्य खाते देण्यात येईल, असेही त्यांनी स्पष्ट केले.