ऑनलाईन टीम / वॉशिंग्टन :
अमेरिकेत कोरोनाबाधितांनी 40 लाखांचा टप्पा ओलांडला आहे. अमेरिकेत आतापर्यंत 40 लाख 28 हजार 733 जणांना कोरोनाची बाधा झाली आहे. तर 1 लाख 44 हजार 958 जणांचा मृत्यू झाला आहे. वर्ल्डोमीटर या संकेतस्थळाने ही आकडेवारी प्रसिद्ध केली आहे.
अमेरिकेत मंगळवारी 67 हजार 140 जणांना कोरोनाची बाधा झाली. तर 1119 जणांचा मृत्यू झाला आहे. जगातील सर्वात जास्त कोरोना संक्रमण अमेरिकेत झाले असून, दिवसेंदिवस तेथील रुग्णसंख्या वाढत असल्याने परिस्थिती चिंताजनक बनली आहे. 40.28 लाख कोरोना रूग्णांपैकी 18 लाख 86 हजार 778 रुग्ण या आजारातून बरे झाले असून, अजूनही 19 लाख 96 हजार 997 ॲक्टिव्ह केसेस आहेत. त्यामधील 16 हजार 710 रुग्णांची प्रकृती चिंताजनक आहे.
न्यूयॉर्क, कॅलिफोर्नियात सर्वाधिक रुग्ण
अमेरिकेतील न्यूयॉर्क शहरात कोरोनाचे संक्रमण सर्वात जास्त आहे. 4 लाख 34 हजार 871 जणांना न्यूयॉर्कमध्ये कोरोनाची बाधा झाली आहे. तर 32 हजार 684 जणांचा मृत्यू झाला आहे. तर कॅलिफोर्नियात 3 लाख 99 हजार 898 जणांना बाधा झाली असून, 7 हजार 769 रुग्ण दगावले आहेत. याशिवाय न्यू जर्सी, टेक्सास, इलिनॉयस आणि फ्लोरिडातही कोरोना संक्रमण मोठ्या प्रमाणात झाले आहे.
