पुणे / वार्ताहर :
एका ग्राहकाला पाचवी नापास असतानाही दहावी उत्तीर्ण असल्याचे बनावट सर्टिफिकेट तयार करुन देणाऱ्या सांगलीच्या तरुणास पुणे पोलिसांच्या गुन्हे शाखेने अटक केली आहे.
संदीप ज्ञानदेव कांबळे (वय 37, मु. दुधारी, पो. टाकरी, जिल्हा सांगली) असे अटक करण्यात आलेल्या तरुणाचे नाव आहे. पोलीस अंमलदार राहुल बाळासो होळकर (वय 31) यांनी स्वारगेट पोलीस ठाण्यात याबाबत तक्रार दाखल केली आहे. ही घटना 8/2/2023 ते 30 /4 /2023 यादरम्यान घडली आहे.
पोलिसांनी दिलेल्या माहितीनुसार, आरोपी संदीप कांबळे याने 60 हजार रुपयांच्या मोबदल्यात विकी रणजीत कांबळे (रा. भवानी पेठ, पुणे) याला तो पाचवी नापास असतानाही दहावी परीक्षा उत्तीर्ण असल्याचे बनावट सर्टिफिकेट तयार करुन दिले. कोरोना काळानंतर वेगवेगळय़ा खात्यांमध्ये निघालेल्या नोकर भरती करता त्याला दहावी उत्तीर्ण प्रमाणपत्राची आवश्यकता होती. त्यामुळे त्याच्या नावाचे महाराष्ट्र राज्य ओपन स्कूलचे दहावीचे स्टेटमेंट ऑफ मार्क्सचे प्रमाणपत्र व असेंट सेकंडरी अँड हायर सेकंडरी स्कूलचे मूळ ट्रान्सफर सर्टिफिकेट आरोपीने तयार केले.
याबाबतची माहिती उघडकीस आल्यानंतर गुन्हे शाखेच्या पथकाने आरोपी संदीप कांबळे याचा शोध घेऊन त्यास अटक केली आहे. तसेच गुन्हे शाखा युनिट दोनचे पोलीस अंमलदार राहुल होळकर यांनी आरोपी विरोधात तक्रार दाखल केली आहे. याबाबतचा पुढील तपास सहाय्यक पोलीस आयुक्त नारायण शिरगावकर हे करत आहेत
