ट्रकची मोटारसायकलला धडक : काकती पोलिसात एफआयआर
प्रतिनिधी /बेळगाव
पुणे-बेंगळूर राष्ट्रीय महामार्गावरील राम धाब्याजवळ भरधाव ट्रकने मोटारसायकलला ठोकरल्याने हत्तरवाड (ता. खानापूर) येथील एका युवकाचा मृत्यू झाला. मंगळवारी दुपारी हा अपघात घडला असून काकती पोलीस स्थानकात या घटनेची नोंद झाली आहे.
अरुण यल्लारी गावडा (वय 38) असे त्या दुर्दैवी युवकाचे नाव आहे. अरुण मोटारसायकलवरून कामानिमित्त कोल्हापूरला गेला होता. कोल्हापूरहून बेळगावला येताना भरधाव ट्रकची धडक बसून झालेल्या अपघातात त्याचा मृत्यू झाला. घटनेची माहिती समजताच काकतीचे पोलीस निरीक्षक गुरुनाथ आय. एस. यांनी घटनास्थळी भेट देऊन पंचनामा केला.
अरुण यांच्या पश्चात आई-वडील, पत्नी, एक मुलगा, एक मुलगी, दोन भाऊ असा परिवार आहे. ट्रकचालक प्रकाश ए. व्ही. (रा. विराजपेठ, जि. कोडगू) याच्यावर एफआयआर दाखल करण्यात आला असून काकती पोलीस पुढील तपास करीत आहेत.
