मोटारसायकली चोरणाऱ्या तिगडी येथील तरुणाला अटक

बेळगाव : मोटारसायकल चोरणाऱ्या तिगडी (ता. बैलहोंगल) येथील एका तरुणाला हिरेबागेवाडी पोलिसांनी शुक्रवारी अटक केली आहे. त्याच्याजवळून 2 लाख 25 हजार रुपये किमतीच्या पाच मोटारसायकली जप्त करण्यात आल्या आहेत. आजाद मेहबुबसुबानी किल्लेदार (रा. तिगडी) असे त्याचे नाव आहे. हिरेबागेवाडीचे पोलीस निरीक्षक नंदीश्वर कुंभार, उपनिरीक्षक अविनाश ए. वाय., साहाय्यक पोलीस उपनिरीक्षक एम. एस. बागी, एम. आय. तुरमरी, एस. पी. पदकीमठ, ए. एस. मिंडोळी, पी. एस. भोसी, पी. एस. कोचेरी, एस. बी. बाबण्णवर व त्यांच्या सहकाऱ्यांनी ही कारवाई केली आहे. हिरेबागेवाडी पोलीस स्थानकाच्या कार्यक्षेत्रात झालेल्या मोटारसायकली चोरी प्रकरणाचा तपास करताना आजादला अटक करण्यात आली. त्याची कसून चौकशी केली असता माळमारुती, मार्केट, काकती, खडेबाजार व खानापूर पोलीस स्थानकाच्या कार्यक्षेत्रात मोटारसायकली चोरल्याची त्याने कबुली दिली. पोलिसांनी आजादला अटक करून त्याच्याजवळून चोरीच्या पाच मोटारसायकली जप्त केल्या आहेत.