वार्ताहर/नंदगड
नंदगड येथील लक्ष्मीदेवी यात्रेनिमित्त सोमवार दि. 17 रोजी दुपारी 3 वाजता महात्मा गांधी कॉलेजजवळ भव्य कुस्ती आखाड्याचे आयोजन करण्यात आले आहे .या आखाड्यात प्रथम क्रमांकाची कुस्ती शिवराज राक्षे पुणे विरुद्ध जलील इराण यांच्यात होणार आहे. दुसऱ्या क्रमांकाची कुस्ती पृथ्वीराज पाटील पुणे विरुद्ध आशिष हुडा यांच्यात, तिसऱ्या क्रमांकाची कुस्ती प्रकाश बनकर गंगावेश तालीम विरुद्ध पवन कुमार हरियाणा केसरी, चौथ्या क्रमांकाची माउली जमदाडे गंगावेश तालीम विरुद्ध विक्रांत कुमार हरियाणा यांच्यात, पाचव्या क्रमांकाची कुस्ती कार्तिक काटे डबल कर्नाटक केसरी विरुद्ध सुमित कुमार हरियाणा केसरी यांच्यात होणार आहे. आखाड्यात नियोजित 50 कुस्त्या होणार आहेत.
मेंढ्याची कुस्ती रोहित माचिगड विरुद्ध राज पवार सांगली यांच्यात होणार आहे. शिवाय आखाड्यात महिलांच्याही कुस्त्या होणार आहेत. त्यामध्ये प्रथम क्रमांकाची कुस्ती प्रांजल यळ्ळूर विरुद्ध राधिका मुधोळ यांच्यात होणार आहे. दुसऱ्या क्रमांकाची कुस्ती शितल खादरवाडी विरुद्ध ऋतुजा गणेबैल यांच्यात होणार आहे.कुस्तीच्या उद्घाटनासाठी गोव्याचे मुख्यमंत्री प्रमोद सावंत, खासदार विश्वेश्वर हेगडे-कागेरी, आमदार भालचंद्र जारकीहोळी, आमदार विठ्ठल हलगेकर, माजी आमदार अरविंद पाटील, यात्रा कमिटीचे अध्यक्ष सुभाष पाटील, कुस्ती कमिटीचे अध्यक्ष अशोक गोरे, उद्योजक वल्लभ गुणाजी आदीसह अन्य मान्यवर उपस्थित राहणार आहेत. कार्यक्रमाला सर्वांनी उपस्थित रहावे, असे आवाहन कुस्ती कमिटीचे अध्यक्ष अशोक गोरे यांनी केले आहे.. आखाड्यासाठी विशेष काटा कुस्त्या नेमण्यात आल्याची माहिती अर्जुन देसाई यांनी दिली आहे.
