वृत्तसंस्था/ पुणे
महिलांच्या टी-20 चॅलेंज क्रिकेट स्पर्धेतील सोमवारी येथे झालेल्या सलामीच्या सामन्यात सुपरनोव्हाजने ट्रेलब्लेझर्सचा 49 धावांनी पराभव करत विजयी सलामी दिली. सुपरनोव्हाज संघाकडून खेळणाऱया पूजा वस्त्रकारने 12 धावांत 4 गडी बाद करीत सामन्यातील सर्वोत्तम खेळाडूचा बहुमान मिळविला.
या सलामीच्या सामन्यात प्रथम फलंदाजी करताना सुपरनोव्हाज संघाने 20 षटकात सर्वबाद 163 धावा जमविल्या. कर्णधार हरमनप्रित कौरने 4 चौकारासह 37, हर्लिन देओलने 5 चौकारांसह 35, डॉटीनने 1 षटकार आणि 5 चौकारासह 17 चेंडूत 32, प्रिया पुनियाने 20 चेंडूत 1 षटकार आणि 2 चौकारासह 22 लुसने 1 चौकारासह 10 तर पूजा वस्त्रकारने 1 चौकारासह 14 धावा जमविल्या. ट्रेलब्लेझर्सतर्फे मॅथ्यूजने तीन तर सलमा खातूनने 2 आणि राजेश्वरी गायकवाड व पुनम यादव यांनी प्रत्येकी एक गडी बाद केला.
प्रत्युत्तरादाखल खेळताना ट्रेलब्लेझर्सला 20 षटकात 9 बाद 114 धावाच जमविता आल्या. कर्णधार स्मृती मानधनाने 4 चौकारासह 34, मॅथ्यूजने 1 षटकार आणि 2 चौकारासह 18, जेमिमा रॉड्रीग्जने 4 चौकारासह 24 आणि रेणुका सिंगने 2 चौकारासह नाबाद 14 धावा जमविल्या. पूजा वस्त्रकारने 12 धावात 4 तर इक्लेस्टोन व ऍलिना किंग यांनी प्रत्येकी 2 गडी तसेच मेघना सिंगने 1 गडी बाद केला.
संक्षिप्त धावफलक
सुपरनोव्हाज 20 षटकात सर्वबाद 163 (हरमनप्रित कौर 37, देओल 35, डॉटीन 32, पुनिया 22, वस्त्रकार 14, लुस 10, मॅथ्यूज 3-29, खातून 2-30), ट्रेलब्लेझर्स 20 षटकात 9 बाद 114 (स्मृती मानधना 34, मॅथ्यूज 18, रॉड्रीग्ज 24 रेणुका सिंग नाबाद 14, पूजा वस्त्रकार 4-12, किंग 2-30, इक्लेस्टोन 2-19).
