पोलीस निरीक्षक श्रीदेवी पाटील : जायंट्स सखीतर्फे पुरस्काराचे वितरण
प्रतिनिधी/बेळगाव
आजची स्त्री ही सर्व क्षेत्रात अग्रेसर असून, महिलांना ज्या ज्या क्षेत्रात संधी मिळाली त्या संधीचे सोने त्यांनी केले. यामुळेच महिलांनी आपले वेगळेपण सिद्ध करून दाखविले. महिलांना निर्भयपणे रिक्षातून प्रवास करता यावे यासाठी प्रभा भीशीरोटी यांच्यासारख्या रिक्षाचालक म्हणून इतर महिलांनीही पुढे यावे असे प्रतिपादन महिला पोलीस स्थानकाच्या निरीक्षक श्रीदेवी पाटील यांनी केले.
जायंट्स सखी स्वयंसिद्धा महिला पुरस्कार वितरण सोहळय़ाचे संयुक्त महाराष्ट्र चौक येथे आयोजन करण्यात आले होते. यावेळी त्या बोलत होत्या. कार्यक्रमाचे प्रास्ताविक करताना महिलांमधील सचोटी, उद्योजकता, कार्यतत्परतेला प्रोत्साहन देण्यासाठी जायंट्स सखीच्या माध्यमातून दरवषी जायंट्स सखी स्वयंसिद्धा पुरस्कार देण्यात येणार असल्याचे सचिव सुलक्षणा शिनोळकर यांनी सांगितले.
उपाध्यक्षा अर्पणा पाटील यांनी परिचय करून दिला. ज्योती अनगोळकर यांनी स्वागत केले. पिंक ऑटोच्या चालक प्रभा भिशीरोटी यांना यावषीचा पुरस्कार देण्यात आला. अध्यक्षा चंद्रा चोपडे व श्रीदेवी पाटील यांच्या हस्ते शाल, श्रीफळ, स्मृतीचिन्ह देवून गौरविण्यात आले.
यावेळी संचालिका नम्रता महागावकर, शितल नेसरीकर, ज्योती सांगुकर, सुवर्णा काळे, राजेश्री हसबे, वैशाली भातकांडे, वृशाली मोरे, अर्चना कंग्राळकर, शिला खटावकर, शितल पाटील, दीपा पाटील, मनिषा कारेकर, वरदा अंगडी, रेणु भोसले उपस्थित होत्या.
