राजापूर :
तालुक्यातील सागरी महामार्गावर मिठगवाणेमधील चिरेखाण स्टॉपनजीक खासगी बसला ओव्हरटेक करताना चालकाचा ताबा सुटल्याने टेम्पो उलटून झालेल्या भीषण अपघातात एका महिलेचा मृत्यू झाला असून टेम्पो चालक आणि पाच महिला गंभीर जखमी झाल्या. शितल सोमा जाधव (60, वाघ्रण-राजापूर) असे मृत झालेल्या महिलेचे नाव आहे. बुधवारी सकाळी 9.15 वाजण्याच्या दरम्यान हा अपघात झाला. या प्रकरणी टेम्पो चालक संतोष आबा नाचणेकर याच्याविरोधात गुन्हा दाखल केल्याची माहिती नाटे पोलिसांनी दिली.
या अपघातात टेम्पो चालक संतोष आबा नाचणेकर (38) याच्यासह सविता बबन जाधव (60), शिल्पा शिवाजी आग्रे (65), रंजना रवीकांत राणे (40), प्रज्ञा प्रकाश डिंगवकर (50), वंदना वसंत जाधव (40) या महिला गंभीर जखमी झाल्या. गंभीर जखमींना अधिक उपचारासाठी रत्नागिरीत हलविण्यात आले आहे. या प्रकरणी मिळालेल्या माहितीनुसार, वाघ्रण येथून या महिलांना घेऊन हा टेम्पो बाकाळेकडे जात होता. या सर्व महिला तेथील एका कोळंबी प्रकल्पावर कामासाठी जातात. दररोज सकाळी त्यांना या टेम्पोने नेऊन सायंकाळी परत आणून सोडले जाते. बुधवारीही सकाळी या महिला कामासाठी टेम्पोने जात होत्या. दरम्यान चिरेखाण बस थांब्यादरम्यान टेम्पोसमोरून जात असलेल्या लक्झरी बसला ओव्हरटेक करताना टेम्पो चालकाचा ताबा सुटल्याने टेम्पो सुमारे 100 ते 150 फूट रस्त्याच्या कडेला उलटत फरफटत गेला आणि हा अपघात झाला.
या अपघातात टेम्पो चालकासह टेम्पोतील सर्व महिला गंभीर जखमी झाल्या. अपघातात टेम्पोचालक आणि केबिनमध्ये असलेले इतर पुऊष प्रवासीही जखमी झाले. जखमींना तत्काळ जैतापूर प्राथमिक आरोग्य केंद्रात दाखल करण्यात आले. त्यानंतर अधिक उपचारासाठी त्यांना जिल्हा शासकीय रुग्णालयात हलविण्यात आले. अपघाताची माहिती मिळताच सागरी पोलीस ठाण्याचे पथक पोलीस सहाय्यक निरीक्षक प्रमोद वाघ यांच्या मार्गदर्शनाखाली घटनास्थळी दाखल झाले. स्थानिक नागरिकांच्या मदतीने सर्व जखमींना तत्काळ ऊग्णालयात दाखल करण्यात आले. पोलिसांकडून या प्रकरणाचा पुढील तपास सुरू आहे. अपघाताची माहिती मिळताच परिसरातील अनेकांनी जैतापूर प्राथमिक आरोग्य केंद्रात धाव घेतली. या प्रकरणी पोलिसांनी टेम्पो चालक संतोष नाचणेकर याच्याविरोधात गुन्हा दाखल केला असून अधिक तपास पोलीस हेडकॉन्स्टेबल हुजरे करत आहेत.
