चिपळूण :
गुंतवणूक केलेल्या रकमेवर दरदिवशी चांगला परतावा देतो असे भासवून एका तरुणाने महिलेला तब्बल २० लाख ८२ हजार ९ रुपये इतक्या रकमेला फसवल्याचा प्रकार पुढे आला आहे. याप्रकरणी अलोरे-शिरगांव पोलीस ठाण्यात त्या तरुणावर गुन्हा दाखल करण्यात आला आहे.
सचिन चांगदेव येळवी (३६, खेर्डी) असे गुन्हा दाखल झालेल्याचे नाव आहे. याबाबतची फिर्याद एका महिलेने दिली आहे. पोलिसांनी दिलेल्या माहितीनुसार गुंतवणूक केलेल्या रकमेवर दर दिवशी चांगला परतावा देतो असे येळवी याने महिलेला सांगितले होते. त्यावर विश्वास ठेवून या महिलेने ७ जुलै २०२३ ते डिसेंबर २०२३ पर्यंत घरातून वेळोवेळी गुगल पे, चेक अशा स्वरुपात एकूण २२ लाख ६६ हजार २३४ रुपये इतकी रक्कम दिलेली आहे. त्यापैकी येळवी याने त्या महिलेला १ लाख ८४ हजार २२४ रुपये इतकी रक्कम परत दिलेली आहे. तसेच २० लाख ८२ हजार ९ रुपये इतकी रक्कम परत दिलेली नाही.
या रकमेची येळवी याच्याकडे वारंवार मागणी केली असता तो काही ना काही कारण सांगून उडवाउडवीची उत्तरे या महिलेला देत असे. यातूनच आपली फसवणूक झाल्याचा प्रकार लक्षात येताच या महिलेने फिर्याद दिली असून त्यानुसार सचिन येळवी याच्यावर गुन्हा दाखल करण्यात आला आहे.
