बांगलादेशचा 14 धावांनी पराभव, शेफर्ड ‘सामनावीर’
वृत्तसंस्था/चेतोग्राम
तीन सामन्यांच्या टी-20 मालिकेत विंडीजने 2-0 अशी विजयी आघाडी घेताना येथे झालेल्या दुसऱ्या सामन्यात यजमान बांगलादेशचा 14 धावांनी पराभव केला. या सामन्यात विंडीजच्या रोमारियो शेफर्डला ‘सामनावीर’ म्हणून घोषित करण्यात आले. त्याने गोलंदाजीत 29 धावांत 3 बळी तर फलंदाजीत 1 चौकारासह 13 धावा जमविल्या. या सामन्यात विंडीजने नाणेफेक जिंकून प्रथम फलंदाजी करताना 20 षटकात 9 बाद 149 धावा जमविल्या. त्यानंतर बांगलादेशने 20 षटकात 8 बाद 135 धावांपर्यंत मजल मारल्यानंतर त्यांना हा सामना 14 धावांनी गमवावा लागला.
विंडीजच्या डावाला कर्णधार शाय हॉप आणि अथांजे यांनी अर्धशतके झळकविताना दुसऱ्या गड्यासाठी 10.1 षटकात 105 धावांची शतकी भागिदारी केली. अथांजेने 33 चेंडूत 3 षटकार आणि 5 चौकारांसह 52 तर हॉपने 36 चेंडूत 3 षटकार आणि 3 चौकारांसह 55 धावा झळकविल्या. चेसने 15 चेंडूत 1 चौकारांसह 17 तर शेफर्डने 16 चेंडूत 1 चौकारासह 13 धावा जमविल्या. विंडीजच्या डावामध्ये 6 षटकार आणि 11 चौकार नोंदविले गेले. विंडीजने पॉवरप्ले दरम्यानच्या पहिल्या 6 षटकात 50 धावा जमविताना 1 गडी गमविला. अथांजेने 30 चेंडूत 3 षटकार आणि 5 चौकारांसह तर हॉपने 30 चेंडूत 3 षटकार आणि 3 चौकारांसह अर्धशतके नोंदविली. बांगलादेशतर्फे मुस्ताफिजुर रेहमानने 21 धावांत 3, नेसुम अहमद व रिशाद हुसेन यांनी प्रत्येकी 2 तसेच तस्किन अहमदने 1 गडी बाद केला.
प्रत्युत्तरादाखल खेळताना बांगलादेशने 20 षटकात 8 बाद 135 धावांपर्यंत मजल मारली. सलामीच्या टी. हसनने 48 चेंडूत 3 षटकार आणि 3 चौकारांसह 61, कर्णधार दासने 4 चौकारांसह 23, रिदॉयने 1 चौकारासह 12, जाकरअलीने 2 चौकारांसह 17 धावा जमविल्या. विंडीजतर्फे शेफर्डने 29 धावांत 3, अकिल हुसेनने 22 धावांत 3 तर होल्डरने 20 धावांत 2 गडी बाद केले. बांगलादेशच्या डावात 3 षटकार आणि 10 चौकार नोंदविले गेले. बांगलादेशने पॉवरप्ले दरम्यानच्या 6 षटकात 37 धावा जमविताना 1 गडी गमविला. टी. हसनने 38 चेंडूत 3 षटकार आणि 2 चौकारांसह अर्धशतक पूर्ण केले.
संक्षिप्त धावफलक
विंडीज 20 षटकात 9 बाद 149 (अथांजे 52, हॉप 55, चेस नाबाद 17, शेफर्ड 13, मुस्ताफिजुर रेहमान 3-21, रिशाद हुसेन व नेसुम अहमद प्रत्येकी 2 बळी, टी. अहमद 1-28). बांगलादेश 20 षटकात 8 बाद 135 (टी. हसन 61, दास 23, रिदॉय 12, जाकरअली 17, शेफर्ड 3-29, अकिल हुसेन 3-22, होल्डर 2-20).
