कोल्हापूर :
शहरातील विविध विषयांसंदर्भात आमदार अमल महाडिक यांनी महापालिका प्रशासक के. मंजूलक्ष्मी यांची मंगळवारी भेट घेतली. शहरातील कचरा उठाव, बंद सिंग्नल सुरू करणे, कचऱ्यावर प्रक्रिया करण्यासह स्वतंत्र जागेची व्यवस्था करणे, शहरातील उद्याने सीएसआर फंडातून सुशोभित करणे आदी विषयावर चर्चा झाली.
बैठकीत आमदार अमल महाडिक यांनी बंद सिग्नल यंत्रणेबाबत विचारणा केली असता, शहर अभियंता नेत्रदीप सरनोबत यांनी नादुरुस्त सिग्नलच्या दुरुस्तीचे काम पूर्ण झाले असून लवकरच कार्यान्वित होतील असे सांगितले. कचरा व्यवस्थापनासाठी इंदोर शहरातील कचरा व्यवस्थापन प्रकल्पाचा अभ्यास दौरा करण्याचा सल्लाही महाडिक यांनी दिला. जिल्हापरिषद आणि महापालिकेच्या संयुक्त विद्यमाने नवीन जागेची पाहणी करून शासनाकडे कचरा प्रक्रिया प्रकल्पासाठी प्रस्ताव सादर करण्याच्या सूचना दिल्या.
नवीन 30 घंटागाड्या आणि एलईडी स्ट्रीट लाईट खरेदीसाठीही प्रस्ताव सादर करण्याची सूचना महाडिक यांनी केली. शहरातील प्रमुख उद्यानांच्या सुशोभीकरणासाठी एमआयडीसी मधील मोठ्या कंपन्यांकडे सीएसआर फंडची मागणी करा, त्यासाठी कंपन्यांच्या अधिकाऱ्यांची बैठक घेऊ. अतिक्रमण निर्मूलन मोहिमेचाही आढावा घेतला. जरगनगर आणि विक्रमनगर या दोन शाळा दत्तक घेण्यासह मनपाच्या शाळांमध्ये सीसीटीव्ही यंत्रणा कार्यान्वित करणे, डिजिटल क्लासरूमची उपलब्धता करु असे सांगितले.
केएमटीचा आढावा घेऊन शहरात रस्त्यांवर ई बसेस येतील असे सांगितले. रंकाळा आणि पंचगंगा प्रदूषण मुक्ती आराखडा सादर करा, पर्यावरण मंत्री पंकजा मुंडे यांच्यामार्फत निधी उपलब्ध करु. तसेच शहरातील रस्त्यांसाठी नगरोत्थानमधून अतिरिक्त निधी आणण्यासाठी प्रयत्न करु, असे सांगितले. क्रीडांगणाची अवस्था, आरक्षित जागा, केशवराव भोसले नाट्यागृह आणि मैल खड्डा येथील प्रस्तावित नवीन प्रशासकीय इमारत संदर्भात बैठकीत चर्चा झाली. यावेळी शहर अभियंता नेत्रदीप सरनोबत, जल अभियंता हर्षजित घाटगे यांच्यासह महापालिकेचे अधिकारी उपस्थित होते.
