कपिलेश्वराचाच जेव्हा नामोल्लेख चुकतो!

बेळगाव : कपिलेश्वर उड्डाणपुलावर शनिवारी रात्री नामफलक बसविण्यात आला. नामफलकावर मराठीत चुकीचा उल्लेख करण्यात आल्याची बाब सोमवारी सकाळी नागरिकांच्या लक्षात आली. कपिलेश्वर नावातच चूक असल्यामुळे भाविकांनी नाराजी व्यक्त केली. यामुळे प्रशासनाचा गलथान कारभार पुन्हा एकदा समोर आला. गोवावेस येथील ओव्हरब्रिजला महिन्याभरापूर्वी जगज्योती बसवेश्वर उड्डाणपूल असे नामकरण करण्यात आले आहे. त्यानंतर आता कपिलेश्वर उड्डाणपुलावर नामफलक बसविण्यात आला. शनिवारी रात्री नामफलक बसवून त्याचे लवकरच उद्घाटन होणार असल्याने तो प्लास्टीकने झाकण्यात आला होता. रविवारी रात्री झालेल्या वादळी पावसामुळे फलकावरील प्लास्टीक उडून गेल्याने नाव स्पष्टपणे दिसू लागले. सोमवारी सकाळी नावामध्ये चूक झाल्याचे नागरिकांच्या लक्षात आले. कपिलेश्वर ऐवजी कपिलश्वर तर ओव्हरऐवजी आवर ब्रिज असा उल्लेख करण्यात आला होता. नागरिकांनी याविषयी जोरदार आवाज उठवताच सोमवारी दुपारनंतर दुरुस्तीचे काम करण्यात आले व ‘दक्षिण काशी श्री कपिलेश्वर ओवरब्रिज’ असा उल्लेख करण्यात आला आहे. मराठीमध्ये भाषांतर करताना चूक केल्याने महापालिका प्रशासनाचा गलथान कारभार पुन्हा एकदा समोर आला.