पुणे / प्रतिनिधी :
काँग्रेसने गुलाम नबी आझाद आणि पृथ्वीराज चव्हाण यांना काय दिले नाही? पक्ष अडचणीत असताना पक्ष सोडणे किंवा नाराजी व्यक्त करून टीका करणे योग्य नाही, असा निशाणा माजी खासदार संजय निरुपम यांनी शनिवारी येथे साधला.
एका कार्यक्रमासाठी निरुपम शनिवारी पुण्यात आले होते. त्या वेळी काँग्रेस भवनमध्ये त्यांनी पत्रकारांशी संवाद साधला. ज्येष्ठ गुलाम नबी आझाद यांनी काँग्रेस सोडल्यानंतर माजी मुख्यमंत्री पृथ्वीराज चव्हाण यांनीही जाहीरपणे नाराजी व्यक्त केली होती. या पार्श्वभूमीवर बोलताना ते म्हणाले, आझाद गेली 42 वर्षे काँग्रेससोबत आहेत. त्यांना पक्षाने 10 वर्षे लोकसभा, पाच वेळा राज्यसभा दिली. ते इंदिरा गांधी, राजीव गांधी, नरसिंहराव, डॉ. मनमोहन सिंग यांच्या मंत्रिमंडळात मंत्री होते. त्यानंतर त्यांना जम्मू काश्मीरचे मुख्यमंत्री करण्यात आले. त्यांना पक्षाने सर्व काही दिले. त्यांचा 2021 मध्ये राज्यसभेतील कार्यकाळ पूर्ण झाल्यानंतर पुन्हा एकदा पक्षाने संधी द्यावी, अशी त्यांची इच्छा होती. सर्व काही एकाच व्यक्तीला देणे शक्य नसते. आझाद यांना जे मिळाले ते काँग्रेसमुळेच मिळाले. ज्यांना आजवर काहीच मिळाले नाही, असे कोटय़वधी काँग्रेस कार्यकर्ते आहेत. आज पक्ष ज्या परिस्थितीतून जात आहे. अशा परिस्थितीमध्ये आझाद यांनी नि:स्वार्थ भावनेने इतर कार्यकर्त्यांसारखे पक्षासोबत उभे राहणे गरजेचे होते. मात्र, ते पक्षाचा राजीनामा देऊन कार्यकर्त्यांची दिशा भरकटवण्याचे काम करत आहेत.
अधिक वाचा : पुण्यात ठाकरे, शिंदेंवरील देखाव्यास परवानगी नाकारली
आझाद यांनी काँग्रेस सोडल्यानंतर माजी मुख्यमंत्री पृथ्वीराज चव्हाण यांनी जाहीर नाराजी व्यक्त करत टीका केली. आझाद यांच्यानंतर चव्हाणही काँग्रेस सोडणार का? या प्रश्नावर निरुपम यांनी आजवर काँग्रेस पक्षाने बाबांना काय दिले नाही? असा सवाल उपस्थित केला.
भाजपावर टीका करताना ते म्हणाले, ज्या प्रकारे राजकीय पक्षामध्ये युवा आघाडी, महिला आघाडी, विविध सेल असतात, त्या प्रकारे भाजपमध्ये युवा मोर्चा, महिला मोर्चासह विविध मोर्चे आहेत. या मोर्चांमध्ये आता ईडी मोर्चाचा समावेश झाला आहे. भाजपकडून विरोधी पक्षांचे सरकार असलेल्या राज्यांमध्ये, विरोधात बोलणाऱ्या नेत्यांना धमकावण्यासाठी ईडीचा वापर केला जात आहे. ईडी म्हणजे किरीट सोमय्या आणि किरीट सोमय्या म्हणजे ईडी हे आता सामान्य नागरिकही बोलू लागले आहेत, असे टीकास्त्रही त्यांनी सोडले
