माजी आमदार महांतेश कवटगीमठ : येळ्ळूरमध्ये नेताजी युवा संघटनेतर्फे आयोजित भजन स्पर्धेचे उद्घाटन
वार्ताहर /येळळूर
वारकरी सांप्रदाय जगात श्रेष्ठ सांप्रदाय आहे. संत तुकाराम महाराजांनी व्यसनमुक्त समाजासाठी कार्य केले. त्याचप्रमाणे नेताजी युवा संघटनेतर्फे सुसंस्कृत समाज घडवण्यासाठी या ठिकाणी संगीत भजन स्पर्धेचे आयोजन केले आहे, ही कौतुकास्पद बाब आहे. युवकांना चांगले संस्कार व चांगल्या संस्कृतीचे आचार विचार देण्यासाठी अशा संगीत भजन स्पर्धांचे आयोजन करणे खूप गरजेचे आहे. अशा स्पर्धांची आमच्या समाजाला आज गरज आहे असे विचार माजी विधान परिषद सदस्य व केएलई संस्थेचे संचालक महांतेश कवटगीमठ यांनी नेताजी युवा संघटनेतर्फे आयोजित नेताजी मराठी सांस्कृतिक भवन येथे संगीत भजन स्पर्धेच्या उद्घाटनप्रसंगी व्यक्त केले. कार्यक्रमाच्या अध्यक्षस्थानी नेताजी युवा संघटनेचे अध्यक्ष किरण गिंडे होते. दीपप्रज्ज्वलन येळ्ळूर ग्रामपंचायत अध्यक्षा लक्ष्मी मासेकरसह इतरांनी केले. विविध फोटो, प्रतिमांचे पूजन मान्यवरांनी केले. व्यासपीठावर प्रमुख वक्ते शिवाजी विद्यालयाचे मुख्याध्यापक एम. बी. बाचीकर, नेताजी सोसायटीचे चेअरमन डी. जी. पाटील, दुद्दाप्पा बागेवाडी, शेतकरी सोसायटीचे चेअरमन दीपक कर्लेकर, श्रीधर कानशिडे, पुंडलिक पावशे, मार्कंडेय साखर कारखान्याचे उपाध्यक्ष आर. आय. पाटील, मार्कंडेय कारखान्याचे संचालक बाबासाहेब भेकणे, सुनील अष्टेकर, कवटगीमठ सोसायटीचे चेअरमन शरद कवटगीमठ आदी उपस्थित होते.
प्रारंभी मुक्ता लोहार हिने गणेशवंदना गायिली. नेताजी युवा संघटनेतर्फे मान्यवरांचा शाल, फेटा बांधून सत्कार केला. प्रास्ताविक चेअरमन डी. जी. पाटील यांनी केले. पाहुण्यांचा परिचय सेक्रेटरी के. एन. पाटील यांनी करून दिला. यावेळी आदर्श शिक्षक अनिल हुंदरे, वनिता अतिवाडकर, सुरेखा पाटील यांचाही सत्कार केला. परीक्षक म्हणून मुख्याध्यापक महेश सडेकर व विजय बांदिवडेकर यांनी काम पाहिले. नेताजी युवा संघटनेचे कार्यकर्ते, नेताजी सोसायटीचे संचालक, सल्लागार, कर्मचारी, ग्रामस्थ, वेळगाव शहर व तालुक्यातील अनेक भजनी मंडळांचे सदस्य उपस्थित होते. स्पर्धेमध्ये एकूण 25 मंडळांनी भाग घेतला असून स्पर्धा सलग दोन दिवस चालणार आहे. सूत्रसंचालन संचालक संजय मजुकर यांनी केले. उपाध्यक्ष रघुनाथ मुरकुटे यांनी आभार मानले.
