अरिहंत चषक व्हॉलिबॉल स्पर्धेचे आयोजन : स्वतंत्र गॅलरीसह स्पर्धेची जय्यत तयारी : लाखेंची बक्षिसे
प्रतिनिधी /निपाणी
निपाणीसह जिह्यातील व्हॉलिबॉलप्रेमींसाठी पर्वणी ठरणारी अरिहंत चषक ही राष्ट्रीय पातळीवरील व्हॉलिबॉल स्पर्धा निपाणीत रविवार 22 पासून सुरू होत आहे. येथील मोहनलाल दोशी विद्यालयाच्या मैदानावर 22 ते 24 जानेवारीअखेर अरिहंत उद्योग समूह तसेच युवाशक्ती यांच्या माध्यमातून बालवीर स्पोर्ट्स क्लब यांच्या पुढाकाराने सदर स्पर्धेचे आयोजन करण्यात आले आहे. या स्पर्धेच्या तयारीची पाहणी शुक्रवारी युवा नेते उत्तम पाटील यांनी केली.
सदर स्पर्धेसाठी लाखेंची बक्षिसे तसेच सुवर्ण, रौप्य तसेच कांस्यपदके आणि अरिहंत चषक दिला जाणार आहेत. या स्पर्धेत राष्ट्रीय तसेच आंतरराष्ट्रीय पातळीवर खेळणारे 40 संघ सहभागी होणार आहेत. सदर स्पर्धेसाठी जनता शिक्षण मंडळाचे अध्यक्ष आशिष शाह यांचेही सहकार्य लाभले आहे. या स्पर्धेचे उद्घाटन 22 रोजी सायंकाळी 5 वाजता होणार असून यावेळी कर्नाटक तसेच महाराष्ट्र व्हॉलिबॉल असोसिएशनचे पदाधिकारी उपस्थित राहणार आहेत.
प्रकाशझोतात खेळविल्या जाणाऱ्या या स्पर्धेसाठी भव्य प्रमाणात विद्युत व्यवस्था तसेच महिला व पुऊषांसाठी स्वतंत्र गॅलरी उभारण्यात आली आहे. सदर स्पर्धेत उत्कृष्ट कामगिरी करणाऱ्या खेळाडूंमधून पुढील महिन्यात गुवाहाटी येथे होणाऱ्या वरिष्ठ पातळीवरील राष्ट्रीय व्हॉलिबॉल स्पर्धेसाठी संघ निवडला जाणार आहे. या स्पर्धेसाठी प्रकाश झोतातील एकूण चार मैदानांची निर्मिती करण्यात आली आहे. याशिवाय दोन अतिरिक्त मैदाने तयार ठेवण्यात आली आहेत.
शुक्रवारी स्पर्धेची पाहणी केल्यानंतर युवा नेते उत्तम पाटील यांनी आवश्यक सूचना केल्या. खेळाडूंबरोबरच प्रेक्षकांचीही गैरसोय होणार नाही याकडे विशेष लक्ष देण्याच्या सूचना करत स्पर्धा यशस्वी करण्यासाठी सहकार्य करण्याचे आवाहन केले. याप्रसंगी गोपाळ नाईक, नगरसेवक रवींद्र शिंदे, संजय सांगावकर, दिलीप पठाडे, शौकत मनेर, शेरू बडेघर, दत्तात्रय नाईक, दीपक सावंत, संजय पावले, शिरीष कमते, इम्रान मकानदार, बालवीर स्पोर्ट्स क्लबचे अध्यक्ष राजकुमार सावंत, प्रा. बाळासाहेब सूर्यवंशी, प्रा. शिवाजी मोरे, सचिन पोवार, आकाश खवरे, विनायक उमराणे यांच्यासह मान्यवर, कार्यकर्ते, नागरिक, खेळाडू उपस्थित होते.
