नववर्षानिमित्त मंदिराला मोठी सजावट : भाविकांची मोठी मांदियाळी
प्रतिनिधी / पंढरपूर
नवीन वर्षाच्या स्वागतासाठी विठ्ठल रुक्मिणी मंदिर सजले असून, मंदिरात आकर्षक फळा-फुलांची आकर्षक सजावट करण्यात आल्याने विठुरायाचे सावळे रूप अधिकच खुलून दिसत होते. या सजावटीमुळे विठ्ठल-रुक्मिणी मातेच्या मूर्तीसह गाभारा पाहून देखील भाविक अधिक समाधानी होत आहे.
श्री विठ्ठल गाभारा, श्री रुक्मिणी गाभारा व श्री संत नामदेव पायरी येथे झेंडू, शेवंती, तोरण, कामिनी आदी 300 किलो फुलांचा व पाच हजार नग संत्रा फळांचा वापर करून मनमोहक व आकर्षक सजावट करण्यात आली आहे. ही सजावट विठ्ठल भक्त प्रदीपसिंह ठाकूर, पुणे यांनी सेवाभावी तत्त्वावर मोफत केली असून, सजावटीचे काम श्री साई डेकोरेटर्स, पंढरपूर यांनी केले आहे. त्यासाठी सुमारे 20 कामगारांनी परिश्रम घेतले. श्री विठ्ठल रुक्मिणी मंदिरात सेवा करण्याबाबत आळंदी (जि. पुणे) येथील प्रदीपसिंह ठाकूर परिवाराने मंदिर समितीकडे सन 20-21 मध्ये इच्छा व्यक्त केली होती. तेव्हापासून म्हणजे मागील पाच वर्षांपासून नववर्षानिमित्त मंदिरात सेवाभावी तत्त्वावर मोफत फुलांची आरास करून देत आहेत. महत्त्वाचे सण, उत्सव, खास दिवस या निमित्ताने श्री विठ्ठल रुक्मिणी मंदिरात फुलांची आरास, सजावट केली जाते.
मंदिर समितीमार्फत पुरेशा प्रमाणात सोयी सुविधा
नववर्षानिमित्त भाविकांची दर्शन रांगेत व मंदिर परिसरात मोठ्या प्रमाणात गर्दी झाली आहे. मंदिर समितीमार्फत पुरेशा प्रमाणात सोयी सुविधा उपलब्ध करून देण्यात येत असून, भाविकांची गर्दी विचारात घेऊन भाविकांचे भरभर दर्शन होण्याच्या दृष्टीने ऑनलाईन दर्शन पास बुकिंग व्यवस्था बंद ठेवण्यात आली आहे. तसेच व्हीआयपी दर्शनावर निर्बंध, पूजेची संख्या कमी करणे व इतर अनुषंगिक उपाययोजना केल्याची माहिती व्यवस्थापक मनोज श्रोत्री यांनी दिली.
