कॅन्टोन्मेंट सीईओपदी विशाल सारस्वत यांची नियुक्ती

बेळगाव : बेळगाव कॅन्टोन्मेंट बोर्डच्या सीईओपदी अखेर विशाल सारस्वत यांची नियुक्ती करण्यात आली. तब्बल महिन्याच्या प्रतीक्षेनंतर नवीन सीईओ बेळगाव कॅन्टोन्मेंटला मिळाले आहेत. त्यामुळे रखडलेल्या विकासकामांना पुन्हा गती मिळणार आहे. ते लवकरच बेळगावमध्ये दाखल होऊन पदभार स्वीकारतील असे सांगण्यात येत आहे. कॅन्टोन्मेंटचे सीईओ राजीव कुमार यांची जबलपूर येथे बदली झाल्याने त्यांची जागा रिक्त होती. तात्पुरता हा पदभार बेंगळूर येथील कॅन्टोन्मेंटच्या प्रमुख दिव्या शिवराम यांच्याकडे सोपविण्यात आला होता. कॅन्टोन्मेंटला कायमस्वरूपी सीईओ नसल्यामुळे विकासकामांना ब्रेक लागला. त्यामुळे कायमस्वरूपी सीईओ नेमण्याची मागणी कॅन्टोन्मेंटमधील रहिवाशांमधून होत होती. अखेर शुक्रवारी संरक्षण मंत्रालयाने देशातील कॅन्टोन्मेंट बोर्डमधील अधिकाऱ्यांची बदली झाल्याचे आदेश प्रसिद्ध केले. त्यामध्ये बेळगावच्या सीईओपदी विशाल सारस्वत यांची नियुक्ती करण्यात आली आहे. विशाल सारस्वत यांनी यापूर्वी उत्तराखंड येथील हरिद्वार जिल्ह्यात रौकी कॅन्टोन्मेंट बोर्डमध्ये सीईओ म्हणून सेवा बजावली आहे. त्यामुळे त्यांच्या अनुभवाचा बेळगाव कॅन्टोन्मेंटला निश्चितच फायदा होईल, असा विश्वास व्यक्त केला जात आहे.