यो-यो टेस्टमध्ये पास झाला विराट कोहली

बेंगळूर : आशिया चषक क्रिकेट स्पर्धा सुरु होण्यासाठी आता अवघे काही दिवस शिल्लक राहिले आहेत. या पार्श्वभूमीवर खेळाडूंच्या फिटनेसची आणि सज्जतेची चाचपणी केली जात आहे. स्पर्धेत सहभागी होत असलेल्या भारतीय खेळाडूंची यो-यो चाचणी नुकतीच पार पडली. भारताचा स्टार फलंदाज विराट कोहलीने उत्तम गुण मिळवत ही चाचणी पार केली आहे. याबाबत त्याने सोशल मीडियावरुन माहिती दिली. विराटने यो-यो टेस्ट उत्तीर्ण झाल्यानंतर आपला आनंद सोशल मीडियावरून व्यक्त केला. त्याने इंस्टाग्रामवर स्टोरी शेअर केली आहे. यामध्ये तो शर्टलेस होऊन मैदानावर बसल्याचे दिसत आहे. चाचणी यशस्वीरित्या उत्तीर्ण झाल्यानंतर केलेल्या विराटने एक पोस्ट केली. यो-यो चाचणी पूर्ण केल्याचा आनंद आहे. 17.2 गुणांसह ही चाचणी पार केली,‘ असं त्याने म्हटले आहे. इतर क्रिकेटपटूंच्या यो-यो चाचणीचे निकाल अद्याप समोर आलेले नाहीत. यो-यो चाचणी दरम्यान श्रेयस अय्यर आणि केएल राहुल यांच्यावर सर्वाधिक नजर असेल. हे दोन्ही खेळाडू दुखापतीतून सावरले आहेत. आयर्लंड दौऱ्याहून परतलेला जसप्रीत बुमराह आणि प्रसिद्ध कृष्णा यांनाही या परीक्षेत उत्तीर्ण व्हावे लागणार आहे. आशिया चषकासाठी निवड झालेल्या सर्व खेळाडूंना यो-यो चाचणी द्यावी लागणार आहे. आशिया चषक आणि विश्वचषकाच्या पार्श्वभूमीवर बीसीसीआय खेळाडूंच्या फिटनेसबाबत कोणताही धोका पत्करण्याच्या तयारीत नसल्याचं बोलले जात आहे.