बेळगाव : थायलंडमधील पटाया येथे झालेल्या जागतिक पातळीवरील शरीरसौष्ठव स्पर्धेत बेळगावचा उदयोन्मुख शरीरसौष्ठवपटू विनोद मेत्रीने सुवर्णपदक व आंतरराष्ट्रीय पंच म्हणून उत्तीर्ण झालेल्या राजेश लोहार यांचा बेळगावच्या विविध संघटनेच्या वतीने जंगी स्वागत व सत्कार करण्यात आला. धर्मवीर संभाजी महाराज चौकात मूर्तीसमोर जंगी स्वागत करण्यात आले. प्रारंभी प्रमुख पाहुणे कर्नाटक राज्य शरीरसौष्ठव संघटना व अँड स्पोर्ट्सचे अध्यक्ष संजय सुंठकर, श्रीराम सेना हिन्दुस्तानचे राष्ट्रीय नेते रमाकांत कोंडुसकर, दलीत नेते मल्लेश चौगुले, अनिल अमरोळी, महाराष्ट्र एकीकरण युवा समिती अध्यक्ष अंकुश केसरकर, मराठा बँकेचे माजी अध्यक्ष दिगंबर पवार, सामाजिक कार्यकर्त्या माधुरी जाधव, नारायण चौगुले, प्रवीण कणबरकर, जितेंद्र काकतीकर, प्रेमनाथ नाईक, गणेश दड्डीकर, आकाश हलगेकर, विनोदची आई सुमन मेत्री, पत्नी गिरीजा मेत्री या मान्यवरांच्या हस्ते धर्मवीर संभाजी महाराजांच्या मूर्तीचे पूजन करण्यात आले.
याप्रसंगी अनिल अमरोळी यांनी खेळाडूंच्या कार्याची माहिती दिली तसेच संघटनेच्यावतीने उपस्थित मान्यवरांचे पुष्पगुच्छ देऊन स्वागत केले. पाहुण्यांच्या हस्ते विनोद व राजेश यांना फेटा बांधून पुष्पगुच्छ देऊन सत्कार केल्यानंतर क्रीडा शौकिनाना मिठाई वाटण्यात आली. खुल्या जीपमधून विनोद व राजेश यांची शहराच्या विविध भागात रॅली काढण्यात आली. वीर राणी चन्नम्मा, डॉ बाबासाहेब आंबेडकर, श्री उभा मारुती मूर्ती, श्री बसवेश्वर महाराज, श्री छत्रपती शिवाजी महाराज मूर्तीचे पूजन करण्यात आले, अनगोळ येथील श्री धर्मवीर संभाजी महाराज यांच्या मूर्तीचे पूजन करण्यात आले. याप्रसंगी बेळगाव जिल्हा शरीरसौष्ठव संघटना व स्पोर्ट्स, अस्मिता क्रिएशन ग्रुपचे पदाधिकारी, एसएसएस स्पोर्ट्स फौंडेशनचे कार्यकर्ते पदाधिकारी व बेळगावातील विविध संघटनेचे कार्यकर्ते उपस्थित होते.
