सावगाव मुख्य रस्त्यावर गतिरोधक घातल्याने ग्रामस्थांतून समाधान

बेळगाव : सावगाव गावातील मुख्य रस्त्यावर गतीरोधक नसल्याने वाहन चालक भरधाव वेगाने वाहने चालवत होते. त्यामुळे अपघातांचा धोका लक्षात घेत बेनकनहळ्ळी ग्रा. पं. चे अध्यक्ष डॉ. वाय. एम. पाटील आणि सदस्य कल्लाप्पा म. पाटील यांनी स्वखर्चातून मुख्य रस्त्यावर गुरुवारी दोन ठिकाणी गतिरोधक घातले. या कार्याबाबत ग्रामस्थांतून समाधान व्यक्त केले जात आहे. बेनकनहळ्ळी, मंडोळी, हंगरगे, खादरवाडी, भवानीनगर, बेळगुंदी आदी गावांतील वाहनचालक व नागरिक दररोज मोठ्या प्रमाणात सावगाव गावातून ये-जा करतात. अलिकडेच अवजड वाहनांची रहदारीही वाढली आहे. गावातील लक्ष्मी मंदिर समोरून जाणाऱ्या मुख्य रस्त्यावर कोठेही गतिरोधक नसल्याने वाहनचालक सुसाट वाहने हाकत आहेत. यामुळे शाळकरी मुले, महिला व वृद्धांना धोका निर्माण झाला आहे. खरे तर सार्वजनिक बांधकाम खात्याकडून रस्त्यावर गतिरोधक घालणे गरजेचे होते. पण त्याकडे दुर्लक्ष झाल्याने संभाव्य धोका ओळखून ग्रा. पं. अध्यक्ष डॉ. वाय. एम. पाटील व सदस्य कल्लाप्पा म. पाटील यांनी स्वखर्चातून काँक्रीटचे गतीरोधक दोन ठिकाणी घातल्याने ग्रामस्थांतून समाधान व्यक्त केले जात आहे.